«Եթե հնարավոր լինի գենոմների խմբագրման մեթոդը կատարելագործել, ապա մարդկությունը կազատվի մի շարք մոնոգենային ժառանագական հիվանդություններից». Հովակիմ Զաքարյան
Կենսաբանական գիտությունների թեկնածու, ՀՀ ԳԱԱ Մոլեկուլային կենսաբանության ինստիտուտի գիտաշխատող Հովակիմ Զաքարյանը ֆեյսբուքյան իր էջում գրել է.
«Երկու օր առաջ հայտնի դարձավ, որ Մեծ Բրիտանիայի իշխանությունները թույլատրելու են գիտնականներին խմբագրել մարդու էմբրիոնների գենոմները հետազոտական նպատակներով: Օգտագործվելու է գենոմային խմբագրման CRISPR/Cas9 համակարգը:
Հետաքրքիր է, որ միայն մեկ գիտական խմբի է թույլատրվելու զբաղվել մարդու էմբրիոնի գենոմային խմբագրմամբ: Եվ այդ խումբը պարտավորված է լինելու գենետիկորեն մոդիֆիկացված էմբրիոնները ոչնչացնել հետազոտությունների ավարտից հետո:
Մինչ այս պահը CRISPR/Cas9 համակարգը օգտագործվել է կենդանիների էմբրիոնների վրա: Հայտնի է, որ այս մեթոդով հնարավոր է խմբագրել գեներում եղած սխալները (մուտացիաները)՝ մեծ հեռանկարներ բացելով բազմաթիվ գենետիկական հիվանդությունների բուժման համար: Օրինակ, երեք տարբեր գիտական խմբերի հաջողվել է այս մեթոդով բուժել Դյուշենի մկանային դիստրոֆիա ունեցող լաբորատոր մկներին: ԱՄՆ-ում հիմնադրված ստարտապներից Editas Medicine արդեն ստացել է շուրջ 120 մլն դոլարի ներդրումներ հետագա հետազոտությունների ու փորձարկումների համար:
Չնայած մեթոդը բավական ճշգրիտ է և աշխատող, սակայն արդյունավետության աստիճանը մնում է ցածր: Հետևաբար, շատ կարևոր է, որ Մեծ Բրիտանիայի գիտնականները կկարողանան մեթոդը փորձարկել մարդկանց էմբրիոնների վրա: Եթե հնարավոր լինի գենոմների խմբագրման մեթոդը կատարելագործել, ապա ապագայում մարդկությունը կազատվի մի շարք մոնոգենային ժառանագական հիվանդությունների ծանր բեռից: Այդ ժամանակ հետաքրքիր կլինի հետևել ԳՄՕ դեմ պայքարող ակտիվիստների ռեակցիաները»: 
