«Մենք վերելակի պահակը չենք, որ կողքին կանգնենք և հասկանանք՝ երեկ ինչ վիճակում էր, վաղը ինչ վիճակում կլինի». Լուսինե Հովհաննիսյան
ՏԿԱԻՆ տեխնիկանան անվտանգության ազգային կենտրոնի փորձաքննության բաժնի պետ Լուսինե Հովհաննիսյանն այսօրվա ասուլիսին ասաց, որ վերելակները, որպես արտադրական վտանգավոր օբյեկտներ, գրանցված են համատիրությունների կազմում և տեխնիկական անվտանգության փորձաքննության պայմանագիր իրենց կազմակերպությունը կնքում է շահագործողի հետ, այսինքն՝ համատիրության:
«Կան համատիրություններ, որոնք փորձաքննության պայմանագիր չեն կնքում, որոնք խուսափում են փորձաքննությունից: Այս տարի Բաշինջաղյան փողոցում տեղի ունեցած մահացու ելքով դժբախտ պատահարից հետո կարծես թե զգոնությունը թե համատիրությունների, թե բնակիչների մոտ մի փոքր ավելացավ և փորձաքննության տեմպերն ավելի շատացան: Տարեկան առնվազն մեկ անգամ ցանկացած արտադրական վտանգավոր օբյեկտ ենթարկվում է տեխնիկական անվտանգության փորձաքննության: Բայց սպասարկող կազմակերպությունները պետք է իրականացնեն օրական, շաբաթական և ամսեկան ստուգումներ: Մենք վերելակի պահակը չենք, որ կողքին կանգնենք և հասկանանք՝ երեկ ինչ վիճակում էր, վաղը ինչ վիճակում կլինի: Մենք վերելակի տեխնիկական վիճակը գնահատում ենք այդ պահի դրությամբ, երբ կնքված է համապատասխան փորձաքննության պայմանագիր և փորձագետն իրականացնում է իր աշխատանքը»:
Մասնագետը նկատեց՝ վերելակների շահագործման առանձնահատկություններից մեկն այն է, որ ով այդ պահին գտնվեց վերելակի խցիկում, հենց ինքն էլ հանդիսանում է այդ պահին շահագործող. «Բացի դրանից՝ վերելակներն այնպիսի փոխադրող միջոց են, որոնք աշխատում են գերծանրաբեռնվածությամբ: Մեր ամենամեծ խնդիրն այն է, որ վերելակների սպասարկման ոլորտում ունենք մասնագետների խնդիր. էլեկտրոմեխանիկները մեծահասակներ են, աշխատում են գերծանրաբեռնված ռեժիմով: Փաստացի շատ տեղերում չունենք տեխնիկական սպասարկում, ունենք վթարային ծառայություններ, բայց ուղղակի զննել և հասկանալ վերելակի տեխնիկական վիճակը, շատ դժվար է: Ունենք պահեստամասերի խնդիրներ, որոնց ներկրումը թանկ է ու ժամանակատար: Բացի այդ՝ վերելակներին խնամքով չենք վերաբերվում: Մարդատար վերելակներն ուղղակի օգտագործում են որպես բեռնափոխադրող միջոց»:
