ՀԱՊԿ-ի Ռազմական կոմիտեն կվերլուծի մասնակից երկրների անվտանգության սպառնալիքները
Ռուսական ТАСС լրատվական գործակալության փոխանցմամբ՝ ապրիլի 8-9-ին Տաջիկստանում տեղի է ունենալու ՀԱՊԿ-ի Ռազմական կոմիտեի նիստը, որում վերլուծության կենթարկվեն հավաքական անվտանգության տարածաշրջանների ռազմական անվտանգության սպառնալիքներն ու մարտահրավերները, ինչպես նաև դրանց արձագանքելու միջոցները:
Այս մասին հայտարարել է կազմակերպության մամլո քարտուղար Վլադիմիր Զայնետդինովը: Նիստը նախագահելու է Ռազմական կոմիտեի նախագահ, Տաջիկստանի զինված ուժերի Գլխավոր շտաբի պետ, գեներալ-մայոր Զարիֆի Թոհիրի Շարիֆզոդան: Նա ընդգծել է, որ նիստում քննարկվելու են ՀԱՊԿ-ի Խաղաղապահ ուժերի զարգացման հեռանկարները և ռազմական բաղադրիչի զարգացման հարցերը:
Քննարկվելու են նաև 2015 թվականին օպերատիվ ու մարտական պատրաստության համատեղ միջոցառումները, ՀԱՊԿ-ի ձևաչափով ՀՕՊ-ի կազմակերպումը, ինչպես նաև ռազմական կադրերի պատրաստումը: Ռազմական կոմիտեի տվյալ նիստը տեղի է ունենալու ՀԱՊԿ-ի կանոնադրական մարմինների նիստի շեմին, որը նշանակված է 2015 թվականի մայիսին:
