Եմենի ռմբակոծությունների ժամանակ տուժել է Ռուսաստանի գլխավոր հյուպատոսությունը
Ռուսական РИА Новости լրատվական գործակալության փոխանցմամբ՝ Սաուդյան Արաբիայի գլխավորած արաբական դաշինքի ռմբակոծության հետևանքով տուժել է Եմենի հարավում գտնվող խոշորագույն քաղաք Ադենում գտնվող Ռուսաստանի գլխավոր հյուպատոսությունը:
Այս մասին գործակալությանը հայտնել է Եմենում Ռուսաստանի դեսպանատանը նրա աղբյուրը. «Չի մնացել որևէ ամբողջական պատուհան»: Նրա խոսքերով՝ դիվանագետները դիտարկում են Ադենում Ռուսաստանի գլխավոր հյուպատոսության փակման ու Ռուսաստանի քաղաքացիներին տարհանելու հնարավորությունը:
Դաշինքը, որի մեջ մտնում են Պարսից ծոցի երկրները, Եգիպտոսը, Հորդանանն ու Սուդանը, Եմենի նախագահի խնդրանքով այդ երկրում մարտի 26-ի գիշերը սկսել են «Վճռականության փոթորիկ» ռազմական գործողությունը: Դաշինքի գործողություններն ուղղված են Եմենի տարածքի մեծ մասը վերահսկող շիա ապստամբների դեմ:
