ՀԵՀ կամավորները պլաստիկ կավից անմոռուկներ են պատրաստում

Հայաստանի երիտասարդական հիմնադրամի (ՀԵՀ) Վայոց ձորի մարզային կենտրոնի կամավորներն այս օրերին պլաստիկ կավից պատրաստում են Հայոց ցեղասպանության 100-րդ տարելիցի խորհրդանիշ «Անմոռուկ» կրծքանշաններ։ 100 օրինակից պատրաստված անմոռուկներն անվճար կբաժանվեն դպրոցականներին, երիտասարդներին։

Նախաձեռնությունը երիտասարդական հիմնադրամի Վայոց ձորի կենտրոնի կամավորներինն է։ Նշենք, որ Հայաստանի երիտասարդական հիմնադրամը կարևորում է արհեստների, նոր մասնագիտությունների ուսուցանումը երիտասարդների շրջանում՝ պարբերաբար կազմակեպելով անվճար դասընթացներ հատկապես անապահով ընտանիքների երիտասարդների համար:

ՀԵՀ Վայոց ձորի մարզային կենտրոնի համակարգող Հասմիկ Մարգարյանը նկատում է, որ փորձը ցույց է տվել, որ նման դասընթացները մեծ պահանջարկ ունեն։ Անցյալ տարի կենտրոնն իրականացրեց պլաստիկ կավի անվճար դասընթաց, որի ընթացքում մասնակիցները սովորեցին պատրաստել տարբեր տեսակի զարդեր և հուշանվերներ: Դասընթացի մասնակիցներն իրենց աշխատանքները բազմիցս ներկայացրել են տարբեր ցուցահանդեսների ժամանակ: Ընդ որում, դասընթացների մասնակիցները դասընթացներից հետո էլ օգնում են և աջակցում կենտրոնի աշխատանքներին՝ կիրառելով ստացած նոր հմտությունները:

Հայաստանի երիտասարդական հիմնադրամի հասարակայնության հետ կապերի ծառայություն