Տուժողի իրավահաջորդ. «Տոների փոխարեն նշում ենք մեռելոցներ, Սուրբ խաչեր, զատիկներ…» (տեսանյութ)
Կոտայքի մարզի ընդհանուր իրավասության դտարանում Վարդան Պետրոսյանի մասնակցության տեղի ունեցված ավտովթարի գործի քննության ընթացքում ռեպլիկով հանդես եկավ տուժողի իրավահաջորդ Նաիրա Հայրապետյանը: Նա ասաց, որ մի ամբողջ տարի տևած դատավարության արդյունքում միջնորդվեց 6 ու կես տարվա ազատարզկման դատապարտել Վարդան Պետրոսյանին՝ «չնայած մեղադրյալը խլեց երկու 16-ամյա լուսավոր տղաների կյանք, որոնք զոհ դարձան անպատասխանատու մարդ արարածի, որը զվարճացած, գինովցած նստեց ղեկին և դժբախտացրեց մայրեր, ընտանիքներ»:
«Կրելով անդառնալի կորուստ՝ կոչ եմ անում բոլոր վարորդներին ղեկին լինել սթափ վիճակում, փաստաբաններին հորդորում եմ արդարացի մեկնաբանություններ կատարել՝ զերծ մնալով կեղծիքից ու անսպառ երևակայությունից: Այս դատի ընթացքում Նիկոլայ Բաղդասարյանը ամեն հնարավորին կերպով մեզ նվաստացրեց, վարկաբեկեց, ոտնահարեց մեր վիշտը հանրության առաջ: Մի՞թե սա է պահանջվում ամբաստանյալին պաշտպանելու համար: Մեր կյանքը նախքան վթարը՝ երեխաներ ենք մեծացրել, հաշվել նրանց տարիքը և հաջողությունները, իսկ հիմա մենք հաշվում ենք տարիները, օրերը առանց նրանց: Տոների փոխարեն նշում ենք մեռելոցներ, Սուրբ խաչեր, զատիկներ:
Հատուկ ցանկանում եմ նշել Վարդան Պետրոսյանի անբարոյական առաջարկի մասին, որ վնասը ամբողջությամբ կհատուցվի միայն մեկ դեպքում՝ եթե «Նիվայի» վարորդը ասի, որ մեքենան հետ է տվել, փակել Վարդանի դիմացը, նոր այդ պայմաններում Վարդանն անմեղ է»,- ասաց տուժողի իրավահաջորդը:
Դրանից հետո Վարդան Պետրոսյանի պաշտպանը բողոքեց, որ իրեն տուժողը «վիժվածք» անվանեց: Նա միջնորդեց դիմել դատախազին՝ քրեական գործ հարուցելու համար:
Ապա Նաիրա Կարապետյանը շարունակեց. «Իմ սրտից և հոգուց պոկված մասնիկն ավելի թանկ է, քան ձեր գրպանից պոկված որևէ նյութական արժեք: Ի վերջո, կյանքը բումերանգ է: Կարող է մի օր ձեզանից յուրաքանչյուրին, ով մեզ քննդատում է, վարկաբեկում, բաժին ընկնի այս աթոռը, որը հիմա ես եմ զբաղեցնում այս դահլիճում: Կարծում եմ՝ միայն այդ դեպքում դուք կհասկանաք իմ անսահման վիշտը՝ չնայած ես որևէ մեկին իմ ճակատագիրը չեմ ցանկանում»:
Նա ավելացրեց, որ քանի դեռ վնասի հատուցման թեման փակված չէ, իրենք շարունակելու են բողոքել, այդ թվում նաև վերաքննիչ դատարան: Իսկ Նիկոլայ Բաղդասարայնի միջնորդությունը կքննարկվի հաջորդ դատական նիստի ընթացքում:
