Մահացել է Վահե Շահինյանը

Հունվարի 9-ին Դամասկոսի հիվանդանոցներից մեկում, սրտի տագնապից  մահացել է Միջինարևելյան լուսանկարչության  մեջ մեծ ավանդ ունեցող սիրիահայ ճանաչված լուսանկարիչ Վահե Շահինյանը, որի լուսանկարչատունը Դամասկոսի հնագույն արհեստանոցներից մեկն է և գտնվում է Հիջազի պատմական կայարանի կողքին:

Բազմաթիվ զբոսաշրջիկների համար  տասնամյակներ շարունակ ծանոթ վայր է եղել   «Քասր Ալ Շարք» պատմական հյուրանոցի մոտ գտնվող ժպտուն հայի հնագույն լուսանկարչատունը:

Վահե Շահինյանի լուսանկարները երկար տարիներ օգտագործվել են Սիրիայի զբոսաշրջության նախարարության կողմից, իբրև Սիրիան լավագույնս ներկայացնող լուսանկարներ, տպագրվել են ալբոմների, կատալոգների և զբոսաշրջային գրքույկների մեջ:

Վահե Շահինյանը լուսանկարել է Դամասկոսի,   Հալեպի և Սիրիայի բոլոր պատմական վայրերը, որոնց մեծ մասն այսօր արդեն անցյալ են, և դրանց ամբողջական պատկերները  պահպանվել են Վահե Շահինյանի՝ արդեն պատմական դարձած  լուսանկարներում:

2012 թվականին Վահե Շահինյանը հալեպյան անցյալի  պատկերները ներկայացնող լուսանկարների շարքով անհատական ցուցահանդես է ունեցել Հայաստանում,  որը մեծ ընդունելության է արժանացել մանավանդ Հայաստանում բնակվող հազարավոր սիրիահայերի կողմից, որոնք  Վահեի լուսանկարներում   տեսել են շեն ու կանգուն Հալեպն ու հուզմունքի պահեր ապրել: Ցուցահանդեսի բացումը կատարել է Ամենայն Հայոց կաթողիկոս Գարեգին Բ-ն:

Խորհրդային տարիներին նա լուսանկարել է նաև Հայաստանն ու հայկական պատմական վայրերը  և դրանք ներկայացրել սփյուռքում: Զբաղվել է նաև գեղարվեստական լուսանկարչությամբ:

Վահե Շահինյանը Սիրիայի պատերազմի առաջին տուժողներից է եղել. պատերազմի սկզբնական  օրերին  նրա բնակարան են ներխուժել զինվորներ, և թալանելով ունեցվածքը՝ կայք հաստատել այնտեղ: Այդ հանգամանքը շատ ծանր է ազդել լուսանկարչի վրա: Շահինյանները, Սիրիայի պատերազմից հետո որոշ ժամանակ բնակվում էին Երևանում:

Վահե Շահինյանի երևանյան ցուցահանդեսի լուսանկարները՝ 168.am-ի