Զուրաբ Ժվանիայի մահվան հետաքննման ժամանակ ի հայտ են եկել կարևոր մանրամասներ
Новости-Грузия լրատվական գործակալության փոխանցմամբ՝ Վրաստանի գլխավոր դատախազ Գեորգի Բադաշվիլին հայտարարել է, որ 2005 թվականին Վրաստանի վարչապետ Զուրաբ Ժվանիայի մահվան հանգամանքների վերստին հետաքննման ժամանակ ի հայտ են եկել կարևոր մանրամասներ:
Բադաշվիլին ընդգծել է, որ ներկայումս չի կարող բարձրաձայնել հայտնաբերված բազմաթիվ կարևոր մանրամասների մասին. «Հետաքննման ընթացքի մասին ամբողջովին իրազեկված են Զուրաբ Ժվանիայի ու Ռաուլ Յուսուպովի ընտանիքները: Դրանք ընդգրկվել են հետաքննման գործընթացում»:
«Վարդերի հեղափոխության» առաջնորդներից Զուրաբ Ժվանիային ու Քվեմո Քարթլիի փոխնահանգապետ Ռաուլ Յուսուպովին Թբիլիսիի բնակարաններից մեկում մահացած վիճակում հայտնաբերել էին 2005 թվականի փետրվարի 3-ի գիշերը: Պաշտոնական վարկածով՝ նրանց մահվան պատճառ է հանդիսացել գազի արտահոսքը:
