Ղազախստանն աջակցում է Ուկրաինայի տարածքային ամբողջականությանը. Նազարբաև
Ուկրաինական UNIAN լրատվական գործակալության փոխանցմամբ՝ Ղազախստանն աջակցում է Ուկրաինայի տարածքային ամբողջականությանն ու կոչ է անում խաղաղ ճանապարհով կարգավորել երկրի արևելքում ստեղծված իրավիճակը: Այս մասին այսօր Կիևում Ուկրաինայի նախագահի հետ համատեղ մամուլի ասուլիսի ժամանակ հայտարարել է Ղազախստանի նախագահ Նուրսուլթան Նազարբաևը.
«Ես դիմում եմ թե՛ Ռուսաստանին, թե՛ Ուկրաինային՝ մտածելու համար այն մասին, որ գտնվի համատեղ փոխզիջում, որպեսզի վերջ տրվի այս պայմաններին, պահպանվի Ուկրաինայի տարածքային ամբողջականությունը և մերձեցվեն առկա դիրքորոշումները, քանի որ այս իրավիճակը նոնսենս է, և այն նորմալ չէ:
Հուսով եմ, որ Ուկրաինան այս իրավիճակից դուրս կգա ամուր, Ուկրաինան կլինի հզոր, ինչպես միշտ է եղել: Հակամարտությունն ու պատժամիջոցները փակուղի ու անորոշություն տանող ճանապարհ են: Կարծում եմ, որ կարելի է գտնել ելքը և վերականգնել իրավիճակը, վերականգնել մեր երկրների հարաբերությունները»:
Ուկրաինայի ու Ղազախստանի նախագահները հաստատել են Մինսկյան պայմանավորվածությունների կարևորությունը՝ Դոնբասում տիրող իրավիճակի կարգավորման համար: Նազարբարևն աշխատանքային այցով Կիև է ժամանել այսօր, որտեղից էլ մեկնելու է Մոսկվա:
Սրանից առաջ հաղորդվել էր, որ Բելառուսի նախագահ Ալեքսանդր Լուկաշենկոն Կիևում Ուկրաինայի նախագահ Պյոտր Պորոշենկոյի հետ հանդիպման ժամանակ հայատարարել էր, թե Բելառուսը պատրաստ է մշտապես օգնել Ուկրաինային:
