ԵՏՄ-ին անդամակցելը նոր հնարավորություններ է բացում տնտեսական զարգացման համար. Աթամբաև
Ռուսական РИА Новости լրատվական գործակալության փոխանցմամբ՝ Ղրղզստանի նախագահ Ալմազբեկ Աթամբաևը Մաքսային միությանն ու ԵՏՄ-ին անդամակցելու մասին համաձայնագրի ստորագրման շեմին վստահություն է հայտնել, որ Ղրղզստանին ու ԵՏՄ-ի երկրներին միավորում է ոչ միայն ընդհանուր պատմությունը, այլև՝ ընդհանուր ապագան.
«ԵՏՄ-ի երկրները պարզապես մեր տնտեսական գործընկերները չեն, նրանք առաջին հերթին ոգով մեզ մոտ կանգնած հարևաններ են: Մենք ունենք ընդհանուր պատմություն, և վստահ եմ՝ ընդհանուր ապագա: Առանց տնտեսական ընդհանուր տիրույթի, հանրապետությանը չի լինի հեշտ, քանի որ անկարելի է վաստակել միայն վերաարտահանումից:
Համաշխարհային փորձը ցույց է տալիս, որ միայն միավորվելով կարելի է հասնել բեկման: Դա օբյեկտիվ իրականություն է: Այդ միավորմանն անդամակցելը նոր հնարավորություններ է բացում տնտեսական զարգացման համար:
Ղրղզստանին անհրաժեշտ է իր ապրանքների, իր աշխատուժի ազատ տեղաշարժի հնարավորություն: Անհրաժեշտ է, որ ազատորեն հանրապետությունում հայտնվեն ֆինանսական ռեսուրսները»:
Դեկտեմբերի 23-ին Ղրղզստանի ղեկավարությունը պատրաստվում է ստորագրել ԵՏՄ-ին միանալու մասին պայմանագիրը: Պլանավորվում է նաև ստորագրել Մաքսային միության մեջ մտնելու մասին պայմանագիր:
Հիշեցնենք, որ սրանից առաջ հաղորդվել էր, որ Ղրղզստանի կառավարությունը հետաձգել է ԵՏՄ-ին միանալու մասին նախագծի դիտարկելը:
