«Արմնյուզը» չի փակվելու
Որոշ ԶԼՄ-ներով լուրեր էին տարածվել, թե փակվելու է «Արմնյուզ» հեռուստաընկերությունը: Նշվում էր, թե «Արմնյուզի» լրատվական թիմը տեղափոխվելու է «Արմենիա TV»-ի «Ժամը» լրատվական ծրագիր: Ավելին, լուրեր սկսեցին շրջանառվել, թե ՀՀԿ-ն առաջիկայում հեռուստաընկերություն է ունենալու, և այն կազմավորվելու է հենց «Արմնյուզի» հիմքի վրա: «ՊանԱրմենիան Մեդիա Գրուպ» ՓԲԸ-ի բաժնետերերի խորհրդի նախագահ և գլխավոր տնօրեն Արմեն Արզումանյանն իր ֆեյսբուքյան էջում տարածվող այդ լուրերի մասին գրառում է կատարել.
«Հարկ եմ համարում պաշտոնապես հայտարարել, որ «ՊանԱրմենիան Մեդիա Գրուպը» որևէ կուսակցության որևէ հեռուստաալիք չի տվել և չի պատրաստվում տալ։ «Արմենիա TV»-ն, ԱՏՎ-ն և «Արմնյուզը» պատրաստվում են նոր տարում ևս զարմացնել բոլորին հետաքրքիր բրենդավորմամբ ու լսարանի ընդլայնմանն ուղղված մտահղացումներով։ Ինձ համար պատիվ է ղեկավարել Հայաստանի լավագույն հեռուստատեսային թիմը, ու մենք շարունակելու ենք մեր հեռուստադիտողներին մատուցել ամենահետաքրքիր հեռուստատեսային կոնտենտը բոլոր ժանրերում` լրատվությունից մինչև զվարճալի հաղորդումներ»:
