Հոնգկոնգի կենտրոնում մեկնարկել է ցուցարարների բարիկադների մաքրման գործողությունը
![](https://168.am/wp-content/uploads/2014/12/pic_1c5f0c15e4b8e99f5aa73071d146c2c3.jpg)
Բրիտանական Reuters լրատվական գործակալության փոխանցմամբ՝ Հոնգկոնգի կենտրոնում այսօր մեկնարկել է բարիկադների մաքրման գործողությունը: Դատական կարգադրիչները ոստիկանության աջակցությամբ մտադիր են օրվա ընթացքում ամբողջովին մաքրել ցուցարարների գլխավոր ճամբարը:
Ճանապարհը մաքրվել է մետաղական արգելափակոցներից, վրաններից ու աղբից: Համապատասխան որոշումն ընդունել է Հոնգկոնգի Գերագույն դատարանը՝ բավարարելով ավտոբուսային ընկերության հայցը: Ուսանողական ցույցերի մասնակիցները թեև դեռ վերջնականապես չեն ցրվել, այնուամենայնիվ հայտարարել են, որ մտադիր չեն խոչընդոտել դատարանի որոշմանը:
Միևնույն ժամանակ արմատական տրամադրություններ ունեցողները մտադիր են պայքարել մինչև վերջ: Դիմադրելու դեպքում նրանց սպառնում է կալանավորում: Հոնգկոնգում բազմահազարանոց ակցիաները մեկնարկել են սեպտեմբերի 26-ին՝ պահանջելով իրենց իրավունք ընձեռել՝ ինքնուրույն ընտրելու համար տեղական իշխանություն: