Բուդաղյանների փաստաբանի բողոքի քննությունը հետաձգվեց
Վերաքննիչ քրեական դատարանում այսօր հետաձգվեց Բուդաղյանների փաստաբան Հայկ Ալումյանի բողոքի քննությունը: Փաստաբանը դատարան չէր ներկայացնել՝ հայտնելով, որ նախապես նշանակված մեկ այլ նիստի պատճառով այսօր չի կարող ներկայանալ նիստին: Հաջորդ դատական նիստը նշանակվեց դեկտեմբերի 23-ին:
Ինչպես հայտնի է, Հայկ Ալումյանը պահանջում է վերացնել որոշումը, որով Զարզանդ Նիկողոսյանի նկատմամբ քրեական հետապնդում չի իրականացվել համաներման հիմքով: Փաստաբանի խոսքով՝ նախաքննական մարմինը հաստատված է համարել, որ Սդղի գյոլ կոչվող տարածքից վերադառնալիս Սյունիքի մարզպետ Սուրիկ Խաչատրյանի ավտոմեքենայի մեջ Ավետիք Բուդաղյանին հարվածել է Զարզանդ Նիկողոսյանը, սակայն համաներման կիրառմամբ՝ նրա նկատմամբ քրեական հետապնդում չի իրականացվել: Նրա խոսքով՝ իրենք պահանջում են վերացնել այդ որոշումը ոչ թե այն պատճառով, որ Զ. Նիկողոսյանի նկատմամբ համաներում չպետք է կիրառվեր, այլ այն պատճառով, որ «ամեն ինչ սխալ է նկարագրված»:
