Սի Ծինփինն արտերկիր մեկնող հայրենակիցներին կոչ է արել չաղտոտել միջավայրը
China News գործակալության փոխանցմամբ` Չինաստանի նախագահ Սի Ծինփինն իր հայրենակիցներին կոչ է արել արտասահմանյան այցերի ժամանակ չաղտոտել տվյալ երկրները, չուտել արագ պատրաստման սնունդ և չվնասել կորալյան խութերը:
Չինաստանի նախագահը Մալդիվներ կատարած այցի ժամանակ քննադատության է մատնել արտասահմանում չինացի զբոսաշրջիկների պահվածքը: Նա հայրենակիցներին խնդրել է դատարկ շշերը չնետել ջուրը, չվնասել կորալյան խութերը, չուտել արագ պատրաստման սնունդ և փոխարենն օգտվել այդ երկրների տեղական խոհանոցներից:
Մալդիվներում չինական համայնքի ներկայացուցիչների հետ հանդիպման ժամանակ Սի Ծինփինը կոչ է արել աշխատել տեղաբնակների աչքերում Չինաստանի իմիջի բարելավման ուղղությամբ: 2013 թվականին Չինաստանի մոտ 100 միլիոն քաղաքացի մեկնել է արտասահման, որոնցից 400.000-ը բաժին է ընկել Մալդիվներին:
Տարեկան կղզային այդ պետություն է այցելում 1.1 միլիոն մարդ, որոնց 1/3-ը չինացիներ են: Չինացի զբոսաշրջիկները հաճախ ավելորդ աղմուկ են հանում և փորձում են գումար խնայել ամեն մի մանրուքի վրա:
