Էրդողանն Ադրբեջան կժամանի սեպտեմբերի 3-ին
Թուրքական Anadolu լրատվական գործակալության փոխանցմամբ՝ Թուրքիայի 12-րդ նախագահի պաշտոնում ընտրված Ռեջեփ Էրդողանն իր արտասահմանյան առաջին այցերն իրականացնելու է դեպի ինքնահռչակ Հյուսիսային Կիրպրոսի թուրքական հանրապետություն (ՀԿԹՀ) և Ադրբեջան:
Այս մասին հայտնել է Թուրքիայի վարչապետական ապարատը: Էրդողանը սեպտեմբերի 1-ին պաշտոնական այցով կմեկնի ՀԿԹՀ, իսկ սեպտեմբերի 3-ին՝ Ադրբեջան:
Ադրբեջանից Էրդողանը կուղևորվի դեպի Ուելս, ուր սեպտեմբերի 4-5-ին անցկացվելու է ՆԱՏՕ-ի գագաթաժողովը: Սեպտեմբերի 21-26-ին էլ Էրդողանը Նյու Յորքում կմասնակցի ՄԱԿ ԳԱ-ի նիստին:
Էրդողանն այս երկու միջազգային համաժողովների շրջանակներում երկկողմ հանդիպումներ է ունենալու մի շարք երկրների ղեկավարների հետ: Էրդողանի երդմնակալությունն անցկացվելու է օգոստոսի 28-ին:
Հիշեցնենք, որ սրանից առաջ ադրբեջանցի փորձագետ Քաբիլ Հուսեինլին հայտարարել էր, որ Էրդողանի առաջիկա ադրբեջանական այցի ժամանակ բարձրացվելու է Նախիջևանում թուրքական ռազմաբազայի ստեղծման հարցը:
