Աբդուլլահ Գյուլը խոստացել է շուտով վերադառնալ իշխող կուսակցության շարքերը
Ռուսական ИТАР-ТАСС լրատվական գործակալության փոխանցմամբ՝ Թուրքիայի նախագահ Աբդուլլահ Գյուլը լրագրողների հետ զրույցում հայտարարել է, որ մտադիր է օգոստոսի 28-ին իր լիազորությունների ժամկետի սպառվելուց հետո վերադառնալ իշխող «Արդարություն ու զարգացում» կուսակցության (ԱԶԿ) շարքերը (թուրքական օրենսդրության համաձայն, Թուրքիայի նախագահը չպետք է զբաղվի նաև կուսակցական գործունեությամբ).
«Անկասկած է, որ նախագահության ավարտից հետո ես կվերադառնամ կուսակցություն: Ինձ համար դա կատարելապես բնական բան է: Վստահ եմ, որ Թուրքիան շարունակելու է ինտենսիվ զարգացումը»:
Գյուլը հիշեցրել է, որ Թուրքիայի նախագահի պաշտոնում գտնվել է 7 տարի, որոնց ընթացքում տեղի են ունեցել բազում իրադարձություններ. «Սակայն ես այդքան ուժեղ չեմ կառչում անցյալից, ես նայում եմ ապագային: Բոլոր խնդիրները ես լուծել եմ համբերությամբ»:
ԱԶԿ-ի հիմնադիրներից Աբդուլլահ Գյուլը Թուրքիայի նախագահ է ընտրվել 2007 թվականին:
Հիշեցնենք, որ Աբդուլլահ Գյուլը Թուրքիայի նախագահի պաշտոնում երեք ռեկորդ է սահմանել:
