Մեծ Բրիտանիան չի մասնակցի Իրաքում գործող զինյալների դիրքերին հնարավոր ավիահարվածներին
Ռուսական ИТАР-ТАСС լրատվական գործակալության փոխանցմամբ՝ Մեծ Բրիտանիան չի մասնակցի Իրաքում գործող «Իսլամական պետություն» խմբավորման զինյալների դիրքերին հնարավոր ավիահարավածներին: Այս մասին այսօր հայտարարել է Մեծ Բրիտանիայի կառավարության պաշտոնական ներկայացուցիչը:
Նա ընդգծել է, որ բրիտանական զորքերն Իրաքում չեն մասնակցի ռազմական որևէ գործողության՝ ներառյալ ավիահարավածները: Նախօրեին ԱՄՆ նախագահ Բարաք Օբաման տվել էր իր համաձայնությունը՝ Իրաքում սուննի զինյալների դիրքերին ճշգրիտ ավիահարվածներ հասցնելու համար, եթե զինյալները սկսեն սպառնալ ամերիկացի դիվանագետներին ու զինվորականներին:
Օբաման նաև արտոնել էր հազարավոր իրաքցիներին մարդասիրական օգնություն առաքելը, որոնք լեռներում ընկել են ծուղակը՝ մնալով առանց սննդի ու ջրի: