Ադրբեջանցի զինծառայողները չեն հասկանում ու չեն վստահում ողջ կյանքում ժողովրդի ցասումը ճնշած Զաքիր Հասանովին. Ֆահրադդին Աբոսզոդա
![](https://168.am/wp-content/uploads/2014/08/images1.jpg)
REX լրատվական գործակալության փոխանցմամբ՝ թալիշական ծագում ունեցող (Ադրբեջանում ծնված) քաղաքագետ ու հասարակական գործիչ Ֆահրադդին Աբոսզոդան «Իլհամ Ալիևի «զվարճական զինվորիկները»» խորագրով իր հոդվածում անդրադարձել է օգոստոսի 8-9-ին Սոչիում կայանալիք Հայաստանի, Ադրբեջանի ու Ռուսաստանի նախագահների հանդիպումներին.
«Անցնող շաբաթն առավել հասկանալի դարձրեց ադրբեջանական բանակի ոչ վաղ անցյալի աղետի հանգամանքները: Այսօր անձամբ ես որևէ կասկած չունեմ, որ հակառակորդի թիկունք դիվերսանտներ ուղարկելու արկածախնդրությունն անձամբ ղեկավարել է Ադրբեջանի նախագահ Իլհամ Ալիևը:
Դրա անուղղակի ապացույցն այն է, որ զորահրամանատարներից ոչ մեկն էլ խիստ հանդիմանության չի արժանացել այդ աղետի համար: Դատելով այդ ամենից՝ Իլհամ Ալիևն այս անգամ որոշել էր փորձել բառի ամենաուղիղ իմաստով գերագույն գլխավոր հրամանատարի դերը՝ հակառակորդի թիկունք ուղարկելով դիվերսիոն խմբեր:
Չի բացառվում, որ նա պատրաստվում էր զգալի վնաս պատճառել հակառակորդին, որպեսզի հետագայում «իրեն ցույց տար» Սոչիում իր գործընկերների հետ հանդիպման ժամանակ: Սակայն գործնականում դա ավարտվեց Ադրբեջանում տասնյակ ընտանիքների համար աղետով, որոնք նախագահի կողմից անգամ չարժանացան ցավակցական խոսքերի:
Իսկ «զվարճական զորքերի» առաջին զինվորի դերում հանդես է գալիս պաշտպանության նախարար Զաքիր Հասանովը, ով ավելի վաղ ծառայել է ներքին զորքերում: Ադրբեջանի իրողղությունները հաշվի առնելով՝ դա նշանակում է, որ նա ողջ կյանքի ընթացքում ճնշել է ժողովրդի ցասումը՝ ապահովելով «իր» նախագահի անվտանգությունը:
Դրա համար էլ երբ այժմ նա ցանկանում է, որ այդ նույն ժողովրդի զավակներն իր հրամանատարության ներքո պաշտպանեն հայրենիքը, զինվորները պարզապես չեն հասկանում և չեն վստահում նրան:
Պաշտպանության նախարարի պաշտոնում Հասանովի գտնվելու ժամկետն արդեն ապացուցել է, որ նրան կատարելապես հասու չեն ռազմագիտության ու ռազմական գործողություններ վարել կարողանալու գաղտնիքները, քանի որ ողջ կյանքում նա զբաղվել է միայն ցույցերի ցրմամբ, իսկ նման կարևոր ռազմական գործողության ժամանակ հանգստանալիս է եղել թուրքական Բոդրումում:
Այդպիսի զվարճանքի արդյունքն արդեն իսկ հայտնի է համայն աշխարհին: Իլհամ Ալիևը խայտառակվեց և հարկադրված եղավ մի քանի օր թաքնվել ժողովրդի աչքից: Եթե անգամ մի պահ պատկերացնենք, որ հրադադարը խախտել են հայերը, ապա միևնույն է՝ ի հայտ են գալիս ադրբեջանական ղեկավարությանը և նրա քարոզչությամբ զբաղվող լրագրողներին ու վերլուծաբաններին հասցեագրված լուրջ հարցեր:
Օրինակ, այդ դեպքում ինչո՞ւ ձեր «Հարավային Կովկասի ուժեղագույն» բանակը չկարողացավ հետ մղել հայերի հարձակումը: Դուք մշտապես վստահեցնում եք, որ ուր որ է՝ վրա կհասնի Հայաստանի կործանումը, որ Ռուսաստանը Հայաստանին վաճառում է «ռազմական հնոտիներ», իսկ Ադրբեջանն ունի ամենաժամանակից տեխնիկա ու սպառազինություն:
Ինչպե՞ս Ղարաբաղյան բանակը նման «հնոտիով» կարողացավ ոչնչացնել ու վիրավորել ադրբեջանցի տասնյակ զինծառայողների, որոնց, ռազմական փորձագետ Ուզեիր Ջաֆարովի խոսքերով՝ որոշել են հուղարկավորել ոչ թե անմիջապես (ինչպես դա պահանջում է շարիաթը), այլ՝ մի քանի օրվա ընթացքում, որպեսզի բնակչությունը չկարծի, թե նրանք զոհվել են մեկ օրում»:
Արդյունքում, Իլհամ Ալիևը, ով պատրաստվում էր Սոչիում քննարկել Ղարաբաղի ճակատագիրը, այժմ հարկադրված է քննարկել «Ադրբեջանի Հանրապետություն» անունով պետական կազմավորման ճակատագիրը»: