Տիգրան Ուրիխանյան. «Պատերազմից ոչ ոք չի շահելու»
Ալիևյան ռեժիմը ժառանգաբար վերարտադրվելու, իշխանությունը պահպանելու և սեփական ժողովրդին այդ իսկ ռեժիմի գոյությունը հիմնավորելու համար ունի ընդամենը մեկ տարբերակ՝ ՀՀ-ի նկատմամբ ռամիլսաֆարովյան գազանություններ, պատերազմի սպառնալիքներ: 168.am-ի հետ զրույցում նման տեսակետ հայտնեց ԱԺ ԲՀԿ խմբակցության խոսնակ Տիգրան Ուրիխանյանը՝ խոսելով հայ-ադրբեջանական հարաբերությունների լարվածության մեծացման մասին:
Տ. Ուրիխանյանն ուզում է, որ ադրբեջանցի ժողովուրդն իմանա, որ կրում ու կրելու են կորուստներ, որ վարկաբեկվում և վարկաբեկվելու է աշխարհով մեկ, և սրա հետևանքները դեռ տասնյակ տարիներ շարունակելու են ազդեցություն ունենալ նրանց վրա:
Ըստ Տ. Ուրիխանյանի՝ անհրաժեշտ է հզորացնել Հայաստանի Հանրապետության պաշտպանական համակարգը, որպեսզի թշնամին իմանա, որ ոտնձգության դեպքում մի քանի անգամ ավելի լուրջ հետևանքների առաջ կկանգնի. «Հայաստանի Հանրապետության արտաքին դիվանագիտությունը պետք է կարմիր թելի, առանցքի պես ասի այն պարզ ճշմարտությունը, որ Ադրբեջանը հիմա գործում է՝ հակասելով միջազգային բոլոր նորմերին, սեփական օրենսդրությամբ ամրագրված իր վրա վերցված պարտավորություններին, ու առհասարակ մարդկային, հումանիստական կարգերի դեմ»:
Հիշեցնենք, որ օգոստոսի 8-9-ը ՀՀ նախագահ Սերժ Սարգսյանն ու Ադրբեջանի նախագահ Իլհամ Ալիևը Սոչիում հանդիպելու են ՌԴ նախագահ Վլադիմիր Պուտինին, որտեղ բանակցություններ կվարեն ղարաբաղյան հակամարտության կարգավորման շուրջ։
Մեր հարցին, թե ՌԴ նախագահն ի՞նչ դերակատարում կարող է ունենալ ստեղծված լարված իրավիճակում, ԲՀԿ-ի խոսնակն այսպես պատասխանեց. «Որպես Մինսկի խմբի մանդատ ունեցող երկրի նախագահ՝ նա կունենա համապատասխան ազդեցություն, թե ինչպիսի՞ն և ի՞նչ ծավալների, թույլ տվեք՝ սպասենք, տեսնենք»:
Ըստ Տ. Ուրիխանյանի՝ եթե նույնիսկ կան պատերազմի ռիսկեր, բոլորը՝ ադրբեջանցիները, տարածաշրջանային և ոչ տարածաշրջանային պետությունները, պետք է հիշեն, որ դրանից չի շահելու ոչ ոք:
