Մանկատան շրջանավարտները, ովքեր այսօր ունեն անմարդկային կենցաղ, երևանցիներ են ու ձեր ընտրողները. Ա. Բախշյանը՝ Տ. Մարգարյանին
Երևանի ավագանու «Բարև Երևան» խմբակցության անդամ Անահիտ Բախշյանը հարցում է ուղարկել քաղաքապետ Տարոն Մարգարյանին՝ լամպերի գործարանի հանրակացարանում ապրող մանկատների նախկին շրջանավարտների ստացած բնակարանների ահավոր պայմանների մասին։
Հարցումը՝ ստորև:
«Հարգելի պարոն Մարգարյան,
Ս.թ. հուլիսի 29-ին լրատվությամբ տարածվել է մի քանի տեսանյութ, որտեղ
նկարագրվում են լամպերի գործարանի հանրակացարանում ապրող մանկատների նախկին
շրջանավարտների ստացած իբրև թե «բնակարաններում» առկա անմարդկային ու
ահավոր պայմանների մասին «Գետո մանկատան սաների համար 29.07.2014»,
Մեկ ամիս `առանց ջրի (տեսանյութ),
«Մեզ էլ մեջը սեփականաշնորհել են» (տեսանյութ)։
Իհարկե այս փաստն արձանագրվել է Վերահսկիչ պալատի 2008 թվականի տարեկան
զեկույցում, բայց դրանից ոչինչ ի փոխվել, այն պաշտոնյաները, ովքեր բառի
բուն իմաստով լափել են մանկատան շրջանավարտների համար բնակարան հատկացնելու
ծրագրով նախատեսված պետական և կարծեմ նաև, միջազգային վարկային գումարները,
կարող է այս պահին շարունակում են աշխատել սոցապ նախարարությունում:
Այսինքն՝ որևէ պաշտոնյա պատասխանատվություն չի կրել այդ գողության համար:
Ինչևէ, խնդիրն հիմա նրանում է, որ պետք է քայլեր ձեռնարկել այս մարդկանց
վիճակը մի փոքր բարելավելու ուղղությամբ: Նրանք նույնպես երևանցիներ են և
Ձեր ընտրողները:
Խնդրում ու հավատում եմ, որ Դուք անպայման կարձագանքեք և անհրաժեշտ
միջոցները կձեռնարկեք նրանց կենցաղը բարելավելու համար:
Շնորհակալություն համագործակցության համար:
Հարգանքներով՝
Անահիտ Բախշյան
Երևանի ավագանու «Բարև Երևան»
խմբակցության անդամ
