Լևոն Հայրապետյանին արդեն մեղադրանք է առաջադրվել փողերի յուրացման և լվացման համար

Ինչպես տեղեկացրել էինք, Ռուսաստանում այսօր ձերբակալվեր էր հայազգի հայտնի գործարար Լևոն Հայրապետյանը։ «Ռոսբալտը» տեղեկացնում է, որ ՌԴ Հետաքննչական կոմիտեն Լ. Հայրապետյանին կալանքի տակ վերցելու վերաբերյալ արդեն միջնորդություն է ներկայացրել  Մոսկվայի Բասմանյան շրջանի դատարան:

Լ. Հայրապետյանը կասկածվում է 2008թ. «Բաշնեֆտ» ընկերության վաճաքի ժամանակ ֆինանսական խարդախություն կատարելու մեջ և նրան մեղադրանք է առաջադրվել փողերի յուրացման և ապօրինի եղանակով ձեռք բերված եկամուտներն օրինականացնելու հոդվածներով։

Ձերբակալությունն իրականացվել է ՌԴ Հետաքննչական կոմիտեի կողմից «կինգիսեպյան» հանցավոր խմբավորման գործունեության հետաքննման շրջանակներում: Այդ խմբավորումը պատվերով իրականացրել է տասնյակ սպանություններ: Խմբավորումը ղեկավարել է «հեղինակություն» Սերգեյ Ֆինագինը: Հետաքննության տվյալներով՝ այդ խմբավորման, ինչպես նաև դրան մոտ կանգնած և Ալեքսանդր Մատուսովի (Բասմաչ) գլխավորած «շչոլկովյան» խմբավորման անդամները երկար ժամանակ իրականացրել են խոշոր գործարարների շահերից բխող սպանություններ:

Այդ գործով ցմահ ազատազրկում կրող նախկին սենատոր Իգոր Իզմեստևը ամռանը վկայություն է տվել, որ Հայրապետյանը ներգրավված է եղել որոշ հանցագործությունների, մասնավորապես՝ «Բաշնեֆտ» ընկերության շուրջ ստեղծված քրեական և տնտեսական, այսպես ասած, «ռազբորկաների» մեջ:

Անցած գիշեր խուզարկվել է Լ. Հայրապետյանի՝ Մոսկվայի «Պրեզիդենտ» հյուրանոցում գտնվող գրասենյակը, որտեղից առգրավվել է «Մակարով» ատրճանակի 2 փաթեթ և փամփուշտներ:

«Ռոսբալտը», սակայն, հղում անելով իրավապահ մարմինների իր աղբյուրներին, նշում է, որ հայ գործարարը սպանությունների հետ կապ  չունի:

Հիշեցնենք, որ Լևոն Հայրապետյանը բնակվում է Մոնակոյում: Հուլիսի 15-ին, երբ Ռուսաստանի Անվտանգության դաշնային ծառայության աշխատակիցները բերման էին ենթարկեցին նրան Մոսկվայի «Դոմոդեդովո» օդանավակայանից, նա վերադառնում էր Մոնակոյից։