Իսրայելը դադարեցրել է Գազայի հատվածի դեմ ռազմական գործողությունները
Ռուսական РИА Новости լրատվական գործակալության փոխանցմամբ՝ իսրայելական բանակը, ենթարկվելով երկրի քաղաքական ղեկավարության որոշմանը, դադարեցրել է Գազայի հատվածում ռազմական գործողությունները: Այս մասին հայտարարել է Իսրայելի բանակի մամլո ծառայության ղեկավարներից Պիտեր Լեռները:
Նրա խոսքերով՝ իսրայելցի զինվորականները դրա հետ մեկտեղ շարունակելու են պատասխանել պաղեստինցի զինյալների կողմից երկրի տարածքը հրթիռակոծելու փորձերին: Այսօր ավելի վաղ Իսրայելի ռազմա-քաղաքական կաբինետը համաձայնվել էր դադարեցնել Գազայի հատվածի դեմ ռազմական գործողությունները, որոնք սկսվել են մեկ շաբաթ առաջ:
Նման միջնորդությամբ կողմերի միջև հանդես էր եկել Եգիպտոսը: Գազայի հատվածում իշխող ՀԱՄԱՍ շարժումը դեռ չի պատասխանել Եգիպտոսի նախաձեռնությանը: ԱՄՆ պետքարտուղար Ջոն Քերին ողջունել է Իսրայելի կողմից ռազմական գործողությունների դադարեցումը:
