Ավակովն աշխատանքից հեռացրել է Դոնեցկի ոստիկանության մոտ 600 աշխատակցի
ZN.UA-ի փոխանցմամբ՝ Դոնեցկի ոստիկանության ստուգումների առաջին փուլն ավարտվել է երեկ: Տված երդմանը հավատարիմ չգտնվելու համար աշխատանքից հեռացվել է գրեթե 600 ոստիկան: Այս մասին Facebook-ի իր էջում գրել է Ուկրաինայի ներքին գործերի նախարար Արսեն Ավակովը:
Նա մանրամասնել է, որ աշխատանքից հեռացված 585 ոստիկաններից մեծ մասի նկատմամբ հարուցվել են համապատասխան քրեական գործեր: Ավակովը հավելել է, որ ներկա դրությամբ ստուգում է իրականացվում ոստիկանության ևս 242 աշխատակցի նկատմամբ:
Ավակովի խոսքերով՝ նման զանգվածային դավաճանությունն ու անարժան պահվածքն ինքնաբերաբար չպետք է խաթարեն այն ոստիկանների արժանիքները, որոնք ծառայում են Ուկրաինային:
