ԿԺԴՀ-ը երկու շաբաթվա ընթացքում հինգերորդ անգամ է հրթիռային փորձարկում անցկացրել
France-Presse լրատվական գործակալության փոխանցմամբ` ԿԺԴՀ-ն այսօր փոքր հեռահարության երկու հրթիռ է արձակել ծովի ուղղությամբ: Այս մասին գործակալությանը հայտնել է Սեուլի ռազմական շրջանակներում առկա աղբյուրը:
Ենթադրվում է, որ դրանով իսկ ԿԺԴՀ-ն իր դժգոհություն է հայտնում ԱՄՆ-ի ու Հարավային Կորեայի համատեղ զորավարժությունների անցկացման կապակցությամբ: Հրթիռներն արձակվել են Կորեական թերակղզու արևելյան ծովափից, գիշերը ժամը 1.30-ի մոտ:
Արձակված հրթիռների հեռահարությունը կազմել է 500 կիլոմետր: ԿԺԴՀ-ի ղեկավարությունը դատապարտել է ԱՄՆ-ի ու Հարավային Կորեայի պլանավորած զորավարժությունները` դրանք որակելով որպես «անհեթեթ սադրանք» և խոստացել է ինքնապաշտպանության նպատակով զարգացնել սեփական միջուկային ծրագիրը:
Զորավարժություններն անցկացվելու են հուլիսի 16-21-ին, դրանց մասնակցելու է «Ջորջ Վաշինգտոն» ավիակիրը, որը հուլիսի 11-ին մուտք է գործել հարավկորեական Պուսան նավահանգիստ: Վերջին երկու շաբաթվա ընթացքում Փհենյանն արդեն հինգերորդ անգամ է հրթիռներ արձակում Ճապոնական ծովի ուղղությամբ:
