ԱՄՆ-ի և Թուրքիայի ռազմածովային ուժերը կարող են ստորջրյա համատեղ վարժանքներ անցկացնել Սև ծովում
Gazeteport-ի փոխանցմամբ՝ «Բալյոզ» (թարգմանաբար՝ «Կռան») ռազմական հեղաշրջման գործով կալանավորված զինվորականների արդարացվելուց հետո առանցքային պայմանագիր է ստորագրվել Թուրքիայի ու ԱՄՆ-ի ռազմածովային ուժերի միջև, ինչն աննախադեպ է 2008 թվականից սկսած:
Թուրքիայի ռազմածովային ուժերի հրամանատարության ու Եվրոպայում ԱՄՆ-ի զորքերի հրամանատարության միջև ստորագրված համաձայնագիրը նախատեսում է ստորջրյա համատեղ վարժանքների անցկացում, որին պետք է մասնակցեն երկու երկրների ռազմածովային ուժերի հատուկ նշանակության ուժերը:
Այն ստորագրել են Թուրքիայի կողմից ռազմածովային փոխգնդապետ Էրջյումենթ Մերթբիրը, իսկ ԱՄՆ-ի կողմից՝ Թիմ Սմալը: Համաձայնագիրը հավանության է արժանացել Թուրքիայի կառավարության կողմից և հուլիսի 6-ին հրապարակվել է Պաշտոնաթերթում:
Թուրքիայի ու ԱՄՆ-ի ռազմածովային ուժերի հատուկ նշանակության ստորաբաժանումների համատեղ զորավարժությունները կարող են անցկացվել Սև ծովում: Պայմանագրի համաձայն, ԱՄՆ-ը դրանցում կարող է կիրառել էլեկտրամագնիսական զենք:
