Տեղի կունենա «Երևան Շոու 2014» մասնագիտացված միջազգային ոսկերչական ցուցահանդեսը
Այս տարի հոկտեմբերի 25-28-ը Համաշխարհային հայ ոսկերիչների միությունն (AJA) արդեն 4-րդ անգամ Երևանում կկազմակերպի «Երևան Շոու 2014» մասնագիտացված միջազգային ոսկերչական ցուցահանդեսը: Ինչպես 168.am-ին հայտնեց միության ներկայացուցիչը, այս տարի ցուցահանդեսին մասնակցելու են ոսկերչական ոլորտում հայտնի արտադրողներ և դիզայներներ ԱՄՆ-ից, Կանադայից, Ռուսաստանից, Իտալիայից, Ֆրանսիայից, Բելգիայից, Շվեցարիայից, Չեխիայից, Լիբանանից, Թայլանդից, Հոնգկոնգից և այլն: Կազմակերպչի հրավերով ցուցահանդեսին կմասնակցեն ավելի քան 150 գնորդ՝ արտադրող, առաքող և առևտուր կազմակերպող ընկերություններ, անհատ ձեռներեցներ Ռուսաստանից, Դուբայից, Մերձավոր Արևելքից, ԱՄՆ-ից, Ղազախստանից:
«Երևան Շոու 2014» ցուցահանդեսին հրավիրված են մասնակցելու նաև հայկական ընկերությունները, ընդ որում՝ տեղական ընկերություններին առաջարկվում է մասնակցության հատուկ առաջարկ:
Ցուցահանդեսը կազմակերպվելու է «Մերիդիան» ոսկերչական ազատ տնտեսական գոտու հարակից տարածքում գտնվող նորաբաց ցուցահանդեսային սրահում (ավելի քան 10,000 քմ.):
