ԱՄՆ պետդեպարտամենտը Հայաստանի ու Ադրբեջանի նախագահներին կոչ է արել շուտափույթ ընդունել Օլանդի հրավերը
Ադրբեջանական Turan լրատվական գործակալության փոխանցմամբ՝ ԱՄՆ պետդեպարտամենտը վերստին Հայաստանի ու Ադրբեջանի նախագահներին կոչ է արել զերծ մնալ ռազմաշունչ հռետորիկայից և հնարավորինս արագ ընդունել Փարիզում հանդիպելու մասին Ֆրանսիայի նախագահ Ֆրանսուա Օլանդի հրավերը:
Այս մասին երեկՎաշինգտոնում լրագրողների հետ ճեպազրույցում հայտարարել է ԱՄՆ պետդեպարտամենտի մամլո քարտուղար Ջեն Փսակին. «Մենք երկու կողմին կոչ ենք անում կրկնապատկել բանակցային սեղանի շուրջ նստելու իրենց ջանքերը և կենտրոնանալ այն օգուտների վրա, որոնք տարածաշրջանին կբերի խաղաղությունը:
Ակնհայտ է, որ ռազմաշունչ հռետորիկան ու հայտարարությունը հակասում են լարվածության նվազեցման սկզբունքներին, և մենք ամուր համոզված ենք, որ դա վնասում է խաղաղության գործընթացին»:
Հիշեցնենք, որ օրեր առաջ էլ նման կոչով հանդես էր եկել ԵԱՀԿ-ում ԱՄՆ-ի ներկայացուցիչ Բրենտ Հարթլին:
