Պորոշենկոն Քերիին, Մերկելին ու Օլանդին իրազեկել է հրադադարի ժամկետի սպառվելու մասին
ZN.UA-ի փոխանցմամբ՝ Ուկրաինայի նախագահ Պյոտր Պորոշենկոն հեռախոսազրույցներ է ունեցել ԱՄՆ պետքարտուղար Ջոն Քերիի, Գերմանիայի կանցլեր Անգելա Մերկելի ու Ֆրանսիայի նախագահ Ֆրանսուա Օլանդի հետ: Այս մասին հայտնել է պետության ղեկավարի մամլո ծառայությունը:
Հեռախոսազրույցների ժամանակ Պորոշենկոն միջազգային գործընկերներին իրազեկել է, որ Ուկրաինայի ազգային անվտանգության ու պաշտպանության խորհրդի նիստում որոշվել է կասեցնել Դոնբասում միակողմանիորեն հաստատված հրադադարի ռեժիմը.
«Ուկրաինական կողմն 10 օր անընդմեջ լիովին կատարել է ստանձնած պարտավորությունները և հավատարիմ է եղել միակողմանիորեն մտցրած հրադադարի ռեժիմին, ինչի համար վճարել է տասնյակ կյանքերով»: Պորոշենկոն հայտնել է այն պայմանները, որոնց դեպքում Ուկրաինան պատրաստ է սկսել քաղաքական բանակցություններ՝ Դոնբասում խաղաղության պլանի իրագործման համար:
Պորոշենկոն Դոնբասում հրադադարի ռեժիմը միակողմանիորեն հաստատելու մասին հայտարարել էր հունիսի 20-ին: Այն սահմանվել էր 7 օրով, ապա և երկարաձգվել էր ևս երեք օրով: Երեկ ժամը 22.00-ին ավարտվել է հրադադարի ռեժիմի տասնօրյա ժամկետը: Հրադադարի ռեժիմի կասեցումը նշանակում է հակաահաբեկչական գործողության վերսկսում:
