Սպասվում է սակավաջուր տարի. զգուշացնում է ԱԻՆ Հիդրոմետ ծառայությունը

ՀՀ ԱԻ նախարարությունում տեղի ունեցավ մամուլի ասուլիս` նվիրված գետերի գարնանային վարարումների, ջրամբարների ջրալցվածության և Սևանա լճի մակարդակի վերաբերյալ ճշգրտված կանխատեսումներին:

Բանախոսներն էին ՀՀ ԱԻՆ Հիդրոմետ ծառայության հիդրոլոգիայի կենտրոնի պետ Լևոն Ազիզյանը և նույն ծառայության օդերևութաբանական կանխատեսումների բաժնի պետ Գագիկ Սուրենյանը, որոնք ներկայացրեցին 2014 թ. գետերի գարնանային վարարումների և մայիս ամսին սպասվող եղանակի կանխատեսումների արդյունքները:

Բացման խոսքում ՓԾ տնօրենի տեղակալ, գեներալ-մայոր Ն. Գրիգորյանը նշեց, որ այս տարի մեզ սպասում է ջրի պակասի սպառնալիք:

– Ներկայիս հիդրոօդերևութաբանական պայմանները ստիպում են ավելի լուրջ մոտենալ ջրօգտագործման հարցերին,- ասաց Լ. Ազիզյանը,- տեղումները նորմայից քիչ են գրանցվել, օդի ջերմաստիճանը` բարձր, իսկ ձյան ծածկույթի բարձրությունը զգալի քիչ է նորմայից: Գետերի ելքերը նույնպես նորմայից ցածր են, և սա նշանակում է, որ մենք պետք է ոռոգման համար նախատեսված ջուրը հնարավորինս խնամքով օգտագործենք, որովհետև տարին սակավաջուր է լինելու:

Հիդրոլոգիայի կենտրոնի պետ Լ. Ազիզյանն անդրադարձավ նաև Սևանա լճի մակարդակի մասին կանխատեսումներին.

– Հիմք ընդունելով սպասվող եղանակային պայմանների և Սևանա լիճ մուտք գործող գետային հոսքի կանխատեսումների ճշգրտումները, լճի մակերևույթից գոլորշացման նորմատիվային մեծությունները, ինչպես նաև այն, որ Արփա-Սևան ջրատարով լիճ տեղափոխման ենթակա ջրի քանակը նախատեսվում է 120 մլն խմ, իսկ «Սևանի մասին» ՀՀ օրենքի համաձայն` լճից ջրառը ոռոգման նպատակով թույլատրվում է առավելագույնը 170 մլն խմ, 2014թ. հուլիսի 1-ին 2014թ. ապրիլի 1-ի համեմատությամբ կանխատեսվում է Սևանա լճի մակարդակի բարձրացում 20-25 սմ-ով՝ 1900.40-1900.45 մ սահմաններում, իսկ 2015 թ. հունվարի 1-ի դրությամբ` լճի մակարդակը կանխատեսվում է 1900.11-1900.16մ սահմաններում, որը լավագույն դեպքում կհամապատասխանի 2014 թ. հունվարի 1-ի մակարդակին, կամ դրանից 5-7 սմ ցածր:

Հիդրոմետ ծառայության օդերևութաբանական կանխատեսումների բաժնի պետ Գ. Սուրենյանը խոսեց առաջիկայում սպասվող եղանակի մասին.

– Այսօր և վաղը հանրապետության տարածքը գտնվելու է ցիկլոնի ազդեցության գոտում: Տարբեր շրջաններում սպասվում են տեղումներ: Օդի ջերմաստիճանի էական փոփոխություն չի սպասվում:

Ասուլիսի ավարտին Ն. Գրիգորյանը ևս մեկ անգամ գյուղատնտեսությամբ զբաղվող մեր համաքաղաքացիներին զգոնության կոչ արեց` հորդորելով խնայողաբար վերաբերվել ոռոգման ջրի պաշարներին` ջրի սակավության պայմաններում հնարավոր վնասները նվազեցնելու համար:

ՀՀ ԱԻՆ Հիդրոմետ ծառայության կանխատեսումներին առավել մանրամասն կարող եք ծանոթանալ այստեղ