Հովիկ Աբրահամյանի նախաձեռնությունը «Դ!ԵՄ ԵՄ» շարժման վրա չի կարող ազդեցություն ունենալ
Սեղմ ժամկետում կուտակային կենսաթոշակների հետ կապված տույժերի հաշվարկի կասեցման մասին օրինագիծ մշակելու ՀՀ վարչապետ Հովիկ Աբրահամյանի նախաձեռնությունը «Դ!ԵՄ ԵՄ» շարժման վրա չի կարող ազդեցություն ունենալ: Ինչպես 168.am-ի հետ զրույցում ասաց շարժման ակտիվիստ Վահան Դուրինյանը, «Դ!ԵՄ ԵՄ»-ի քայլերի վրա դա կազդի այն դեպքում, երբ հստակ ինչ-որ բան լինի, այսինքն՝ փաստաթուղթն ընդունվի:
«Խոսքերը՝ ինչ քանակությամբ և ինչ որակի ուզում է լինի, չեն ազդի, որովհետև խոսքեր շատ են եղել»,- ասաց Վ. Դուրինյանը:
Մեր դիտարկմանը, որ նախկին վարչապետ Տիգրան Սարգսյանը բավականին շատ էր փորձում շարժման հատկապես ակտիվ անդամների հետ առանձին հանդիպել ու «երկխոսել», արդյոք Հովիկ Աբրահամյանը փորձե՞լ է առանձին հանդիպել և հատուկ մոտեցում ցուցաբերել, Վ. Դուրինյանը պատասխանեց, որ նոր վարչապետը դեռ քայլ չի արել ակտիվիստներին հանդիպելու համար:
Անդրադառնալով այսօր 19:30 Բաղրամյան 26-ի դիմաց կայանալիք ակցիային Դուրինյանը նշեց, որ այդ ակցիայով ավելի շատ ուզում են հստակեցնել Սահմանադրությունում ամրագրված այն դրույթը, որ երկրի նախագահը ՍԴ երաշխավորն է:
«Եվ քանի որ ներկա դրությամբ Սահմանադրությունը խախտված է նույն պաշտոնյաների՝ նախագահի ենթակաների կողմից, մենք կոչ ենք անում այդ պաշտոնյաներին ուշքի բերել»,- նշեց Վ. Դուրինյանը:
