ԲՀԿ-ն և ՀՅԴ-ն չեն բացառում իշխող կոալիցիային անդամակցելը. «Ազատություն»
«Ազատություն» ռադիոկայանի փոխանցմամբ՝ ՀՅԴ խորհրդարանական խմբակցության ղեկավար Արմեն Ռուստամյանը չի բացառում, որ Դաշնակցությունը դառնա իշխող կոալիցիայի անդամ, բայց` պայմանով. «Եթե ամբողջ մեր մոտեցումներն ընդունվում են, մեր 7 կետերից բխած քաղաքականությունը որդեգրվում է: Դրան համապատասխան վերահսկման հնարավորությունները առաջանում է… Եթե այդ ամեն ինչը երաշխավորվում է, ինչո՞ւ ոչ: Մենք ամեն տեղ էլ պատրաստ ենք մտնել և ստանձնել այդ պարտավորությունը»:
Դաշնակցությունը, հիշեցնենք, 2012-ին ներկայացրել էր 7 կետանոց օրակարգ, որում կարևորել էր անցումը 100 տոկոսանոց համամասնական ընտրակարգի և կառավարման խորհրդարանական համակարգի, ընդդիմությանը վերահսկողության լծակների տրամադրումը, բիզնեսի և քաղաքականության հստակ տարանջատումը, դատական իշխանության լիարժեք անկախությունը, արտաքին քաղաքականության մասով Հայաստանի և Լեռնային Ղարաբաղի միջև ռազմաքաղաքական դաշինքի կնքումը, հայ-թուրքական արձանագրություններից Հայաստանի ստորագրությունը հետ կանչելը:
Նախորդ նախագահական ընտրություններից առաջ ՀՅԴ-ն նույնիսկ հայտարարել էր` եթե Սերժ Սարգսյանն ընդունի կուսակցության առաջարկները, կսատարեն նրա թեկնածությունը: Այդ ժամանակ Սարգսյանը չընդունեց նրանց առաջարկությունները:
Նոր կառավարության ձևավորման փուլում Դաշնակցությունը հիշեցնում է իշխանությանը մաս կազմելու իր պատրաստակամության մասին: «Որովհետև անհասկանալի կլինի: Եթե դու ասում ես` այս ծրագիրը ճիշտ է, և ասում են` արի այս ծրագիրն իրականացնենք, դու եթե մերժում եմ, ուրեմն դրանից երկու եզրակացություն. կա’մ ներկայացրած ծրագիրդ է թերի, սխալ, կա’մ դու ինքդ այդ պրոֆեսիոնալ մակարդակը չունես, որ քո իսկ ասածն իրականացնես»:
«Բարգավաճ Հայաստան»-ը նույնպես չի բացառում նոր կառավարության մաս դառնալը: Վարչապետի պաշտոնում ամենաքննարկվող թեկնածուն կուսակցության ղեկավար Գագիկ Ծառուկյանի խնամի Հովիկ Աբրահամյանն է:
Հարցին, թե հնարավոր է ԲՀԿ-ն դառնա իշխող կոալիցիայի անդամ, կուսակցության ղեկավար անդամ, ԱԺ պատգամավոր Միքայել Մելքումյանը պատասխանեց. – «Այս պահի դրությամբ ես չեմ կարող այդ հարցին դրական արձագանքեմ: Այս պահի դրությամբ դա չի երևում: Այս պահը ես նկատի ունեմ այսօր»:
Նրա փոխանցմամբ` վարչապետ նշանակելու հարցով նախագահը քաղաքական ուժերի հետ դեռևս չի խորհրդակցել: Ուստի Մելքումյանը չշտապեց խոսել նոր վարչապետի մասին:
Հովիկ Աբրահամյանին, այդուհանդերձ, որակեց որպես «ճանապարհ անցած անձնավորություն». «Ինքը որպես և’ ճանապարհ անցած անձնավորություն, և’ Ազգային ժողովի նախագահի կարգավիճակում դրական կարող եմ բնութագրել: Բայց եկեք սպասենք, եկեք չշտապենք»:
ՀՅԴ-ի և ԲՀԿ-ի համար կառավարության ոչ միայն կազմի փոփոխությունն է կարևոր, այլև ծրագրի: Կառավարությունը, մասնագիտությամբ տնտեսագետ Միքայել Մելքումյանի կարծիքով, պետք է հաշվի առնի անցյալի տխուր փորձը, ցանկալի է` իրենց առաջարկած դրույթներով:
Ամբողջությամբ կարող եք կարդալ սկզբնաղբյուր կայքում:
