Ադրբեջանցի պաշտոնյաները սիրում են զվարճանալ Դուբայում
Ադրբեջանական haqqin.az պարբերականն անդրադարձել է ադրբեջանցի պաշտոնյաների` ֆինանսների նախարար Սամիր Շարիֆովի եւ Բաքվի մետրոպոլիտենի նախկին պետ Թաղի Ահմեդովի խիստ «համեստ» կենսակերպին` հեգնանքով նկատելով, որ փող ունենալու եւ Դուբայում շքեղ հանգիստ վայելելու համար նրանց ամենեւին պետք չէ ունենալ, օրինակ, Բիլ Գեյթսի կամ Սթիվ Ջոբսի տաղանդը:
Պարբերականը նշում է, որ ընտանեկան եւ այլ «առիթների» համար նշված անձինք նախընտրում են մեկնել Դուբայ: Նովրուզը եւս նրանք ընտանիքներով նախընտրում են անցկացնել այնտեղ, իրենց համար սովորական դարձած «Atlantis» հինգաստղանի հյուրանոցի «համեստ» համարում, որի արժեքն ընդամենը յոթ հազար դոլար է` մեկ օրվա համար:
Ըստ պարբերականի` եթե Թաղի Ահմեդովի դեպքը պարզ է, նա գումարներ «կուտակել է» մեկուկես տասնամյակ մետրոն «ղեկավարելու» ընթացքում, ապա պարզ չէ, թե ինչ միջոցներով է «Atlantisе»-ում հանգիստը վայելում գործող ֆինանսների նախարարը, որի աշխատավարձը կազմում է 2500 դոլար:
