Ջորջ Սորոսը կանխատեսում է Եվրամիության փլուզումը
«Եվրամիության ողբերգությունը» կոչվող իր գրքում ամերիկացի ֆինանսիստ Ջորջ Սորոսը վերլուծել է այս կառույցում ստեղծված իրավիճակը եւ հանգել այն եզրակացության, որ ներկայումս Եվրամիությունում ահագնանում է ֆինանսատնտեսական անհավասարակշռությունը, ինչի պատճառով Եվրամիությանը փլուզում է սպառնում:
«Եվրամիության եւ եվրագոտու հիմնական խնդիրն այն է, որ ԵՄ վարկատու եւ վարկառու երկրների միջեւ անդուդը գնալով խորանում է: Եվրամիությունը գնում է դեպի լճացում, որը կխորացնի անհավասարակշռությունը»,-ֆինանսիստին է մեջբերել ԻՏԱՌ- ՏԱՍՍ-ը:
Նա միաժամանակ նշել է, որ «ֆինանսական ճգնաժամի ամենասուր փուլն» անցել է, եւ հիմա ԵՄ-ն քաղաքական ճգնաժամի շեմին է, որն արտահայտվում է երկու հարթության վրա. եվրոյի հետ կապված դժվարություններ, ինչպես նաեւ բարդություններ Մեծ Բրիտանիայի եւ ԵՄ հետ հարաբերություններում: «Արդյունքում ծայրահեղ աջերը կարող են ստանալ ԵՄ երկրներում ձայների մինչեւ 1/3-ը, ինչը հսկայական ազդեցություն կունենա ԵՄ համար եւ մեծ սպառնալիք կարող է պարունակել»,-նշել է Սորոսը:
