Դեշիցյա. «Եթե Մոսկվա դադարեցնի գազամատակարարումը, կանցնենք վառելափայտի». «Ազատություն»
Ուկրաինայի արտաքին գործերի նախարարի պաշտոնակատար Անդրեյ Դեշիցյան այսօր Կիևում կայացած մամուլի ասուլիսի ժամանակ հայտարարել է, որ Ղրիմում մարտի 16-ին կայանալիք հանրաքվեն անօրինական է:
«Հանրաքվեն բողոքարկելու միակ ձևը միջազգային հանրությանն ասելն է, որ քվեարկության արդյունքները չեն ունենա որևէ իրավական հիմք»,- «Ազատություն» ռադիոկայանի փոխանցմամբ՝ ասել է Դեշիցյան:
Խոսելով ռուսական գազի մատակարարումների հնարավոր դադարեցման մասին՝ Ուկրաինայի արտաքին քաղաքական գերատեսչության ղեկավարը նշել է․ «Եթե Ռուսաստանը դադարեցնի գազի մատակարարումները, մենք ստիպված կլինենք այլ աղբյուրներ հայթայթել, ասենք՝ վառելափայտ: Ի վերջո, մենք կարող ենք նաև առանց ջեռուցման մնալ, ի վերջո, դրսում արդեն գարուն է»:
