«Հոգեբուժական բժշկական կենտրոն» ՓԲԸ Ավանի հոգեբուժական կլինիկայի աշխատակիցները դիմել են Դերենիկ Դումանյանին
«Հարգելի պարոն Դումանյան,
Ձեզ են դիմում «Հոգեբուժական բժշկական կենտրոն» ՓԲԸ Ավանի հոգեբուժական կլինիկայի աշխատակիցների գերակշռող մեծամասնությունը:
Ակնկալելով Ձեր արդարամտությունը` ցանկանում ենք ներկայացնել Ավանի հոգեբուժական կլինիկայի ղեկավար Արեգա Ռոբերտի Հակոբյանի իրական կերպարը` հույս ունենալով «Հոգեբուժական բժշկական կենտրոն» ՓԲԸ լուծարումից հետո նրան այլևս չտեսնել մեր կլինիկայում:
Միայն սեփական գրպանի պարունակությամբ մտահոգ, բնակչության հոգեկան առողջության համար կարևորագույն նշանակություն ունեցող և իր կողմից ղեկավարվող բուժհաստատությունը որպես «դուքան», իսկ իր պաշտոնը` որպես «խոպան» դիտարկող անձն իրավունք չունի գտնվել մեկ շարքում բարեխիղճ, հմուտ, հարգանքի արժանի, իրենց հիվանդների ապաքինմամբ մտահոգ և հոգատար բժիշկների հետ:
Արեգա Հակոբյանը հոգեբուժական ախտորոշում ունեցող հիվանդին, հիվանդի հարազատին և նույնիսկ իր ղեկավարությամբ աշխատող բժշկին դիտարկում է միայն որպես եկամտի աղբյուր` քայլող-խոսող թղթադրամ:
Չունենալով կլինիկայի ղեկավարին վայել գիտելիքների պաշար և միայն ու միայն իր բարեկամական-ընկերական կապերի շնորհիվ որպես նվեր ստանալով կլինիկայի ղեկավարի պատասխանատու և կարևոր պաշտոնը` Արեգա Հակոբյանն իր պաշտոնավարման ողջ ժամանակահատվածում կլինիկայում աշխատող բուժանձնակազմի գերակշիռ մասի նկատմամբ մշտապես ցուցաբերել է վիրավորական, նվաստացուցիչ, արհամարհական և անհարգալից վերաբերմունք:
Իր անձնական ամբիցիաները բավարարելու և ինքնահաստատվելու համար, ցուցաբերելով կլինիկայի ղեկավարին և բժշկին անհարիր վարք, գործածելով անկիրթ, անդաստիարակն մարդուն բնորոշ ժեստեր և արտահայտություններ` Արեգա Հակոբյանը կարող է, առանց խղճի խայթի, անհարգալից և լկտի վերաբերվել նույնիսկ իրենից տարեց և փորձառու բժիշկների նկատմամբ` ողջ կոլեկտիվի առջև անվանելով նրանց խոսքն, օրինակ` «մանկական թոթովանք», այդպիսով խախտելով սուբօրդինացիայի և պատշաճ գործընկերային փոխհարաբերությունների բոլոր նորմերը:
Արեգա Հակոբյանը հիմնականում կլինիկա է գալիս ուշացումով, կլինիկան լքում է աշխատանքային օրվա ավարտից շուտ` այդպիսով տեղյակ չլինելով կլինիկայի առջև ծառացած և հրատապ լուծում պահանջող խնդիրներին, արհամարհելով թե’ հիվանդների, թե’ կլինիկայի աշխատակազմին հուզող հարցերը, չմտահոգվելով և որևէ կերպ չաջակցելով բժիշկներին իրենց դժվարին աշխատանքում:
Բժիշկների և հիվանդների հանդեպ արհամարհական և լկտի վերաբերմունքի դրսևորումն սկսվում է աշխատանքային օրվա ամենասկզբից, երբ առավոտյան նրա ուշացումների պատճառով բոլոր բժիշկները ստիպված են լինում գրեթե յուրաքանչյուր օր 20-30 րոպե սպասել կլինիկայի ղեկավարի աշխատասենյակի դիմաց նրա գալուն` առավոտյան ժողովներն անց կացնելու նպատակով: Այդպիսով խաթարվում է կլինիկայի բոլոր բաժինների աշխատանքը` ներբաժանմունքային պարտադիր համայցերը, հիվանդների ամենօրյա զննությունն ու զրույցները: Փոխարենը, նա գրեթե երբեք չի բարեհաճում զգուշացնել իր ուշացման մասին կամ գոնե ներողություն խնդրել մոտ երկու տասնյակ բժիշկներին սպասեցնելու համար:
Նմանատիպ իրավիճակ է թերևս յուրաքանչյուր աշխատանքային օր: Հիվանդներն ու նրանց հարազատները ստիպված են ժամերով կանգնել կլինիկայի ղեկավարի և նրա մտերիմ ընկերուհու կամ կցորդի` դիսպանսեր բաժնի վարիչի դռների առջև` իրենց հուզող որևէ խնդրի պատասխան ստանալու նպատակով, մինչև վերջիններս կավարտեն իրենց սուրճ և թեյ ըմպելը, իրենց նոր գնված հագուստի, օծանելիքի կամ այլ իրերի «մոդայիկ» ցուցադրությունները:
Կլինիկայի ղեկավարի «թեթև ձեռքով» Ավանի հոգեբուժական կլինիկան վեր է ածվել իր և իր մի քանի թիմակիցների համար բիզնես օբյեկտի և հեշտ եկամուտներ ստանալու վայրի: Վճարունակ և ապահովված հոգեբուժական ախտորոշում ունեցող հիվանդները կամ նրանց հարազատներն, ովքեր ի վիճակի են ահռելի գումարները «վճարել», ճանաչվում են հոգեպես առողջ, ինչի արդյունքում ստանում են ավտոմեքենա վարելու, երբեմն նաև զենք կրելու իրավունք: Իսկ հոգեբուժական դիսպանսերում հաշվառման մեջ չգտնվելու մասին տեղեկանքները մինչ վերջերս ապօրինաբար տրվում էին 5.000 դրամի վճարելու դիմաց` յուրաքանչյուր օրվա վերջում լցնելով մեր կլինիկայի ղեկավարի գրպանը շուրջ 100.000 դրամով:
Խնդրում ենք ուշադրություն դարձնել` յուրաքանչյուր օր: Հավանաբար դրա շնորհիվ էլ մեկ տարվա ընթացքում ընդամենը մի քանի տասնյակ հազար դրամ ամսական աշխատավարձ ստացող կլինիկայի ղեկավարը կարողացավ Բալահովիտի մերձակայքում կառուցել իր շքեղ ամառանոց-առանձնատունն ու կահավորել այն:
Հարգելի պարոն Դումանյան, հայկական հոգեբուժության դպրոցն ու ծառայությունը միշտ համալրված են եղել խորհրդային և հայկական հոգեբուժության ոլորտում մեծ ավանդ ունեցող և հարգված պրոֆեսիոնալներով: Մենք` Ավանի կլինիկայի բժիշկներս, աշխատել ենք խորհրդային և հայկական հոգեբուժության բարձր պրոֆեսիանալիզմ և բարոյական լավագույն հատկանիշներն ունեցող, մեծ հռչակ վայելող գիտնականների, պրոֆեսորների, դոցենտների հետ և նրանց ղեկավարությամբ:
Առողջապահության հատկապես ա’յս ոլորտում պարտադիր է լինել բարեխիղճ, և ունենալ բարձր պրոֆեսիոնալիզմ: Մեղմ ասած` Արեգա Հակոբյանն աչքի չի ընկնում բարեխղճությամբ, պրոֆեսիոնալիզմով ու կարգապահ ղեկավարի հատկանիշներով:
Պարոն նախարար, նման անպատասխանատու, անպարկեշտ, անբարոյական և կոռումպացված անձնավորության հետ աշխատել միևնույն կոլեկտիվում այլևս անհնար է:
Ոտնահարվում է մեր կիլինկայի բժիշկների, միջին բուժանձնակազմի և մյուս աշխատակիցների արաժանապատիվ աշխատելու իրավունքն ու պատիվը: Ուստի խնդրում ենք Ձեր աջակցությունը և օգնությունը` «Արեգա Հակոբյան» պատուհասից Ավանի հոգեբուժական կլինիկայի աշխատակիցներիս ազատելու համար:
Հ.Գ. Հաշվի առնելով վերոհիշյալ անձին բնորոշ որոշ հատկանիշները, նրա ունեցած բարեկամական-ընկերական-սիրային լուրջ կապերը` գրությունը թողնում ենք անստորագիր` հայցելով Ձեր ներողամտությունը»:
