Աղդամի 22-րդ տարելիցի կապակցությամբ՝ Արտակ Զաքարյանը դիմել է տարբեր երկրների խորհրդարանական գործընկերներին
ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը նամակով դիմել է տարբեր երկրների խորհրդարանական գործընկերներին Աղդամի իրադարձությունների (Խոջալուի սադրանքի) 22-րդ տարելիցի կապակցությամբ.
«2014 թվականի փետրվարի 26-ին ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը Աղդամի մերձակա տարածքում տեղի ունեցած իրադարձությունների (Խոջալուի սադրանքի) 22-րդ տարելիցի կապակցությամբ նամակով դիմել է արտասահմանյան տարբեր երկրների գործընկեր խորհրդարանների արտաքին հարաբերությունների հանձնաժողովների նախագահներին` կոչ անելով չտրվել ադրբեջանական պրոպագանդայի պարզունակ հնարքներին, որոնք կարելի է որակել որպես Ադրբեջանի պետական հովանավորչությամբ կառավարվող և դրանից սնվող հակահայկական ռասիզմ, քսենոֆոբիա և ատելության քարոզչություն:
Իր նամակում Զաքարյանը նշել է, որ չնայած նրան, որ շուրջ 22 տարի է անցել Աղդամի դաժան իրադարձություններից, պաշտոնական Բաքուն միջազգային բոլոր հարթակներում զբաղված է միայն պատմական փաստերի խեղաթյուրմամբ ու հակահայկական հիստերիայի հրահրմամբ` նպատակ ունենալով սեփական մեղքը բարդել ղարաբաղյան կողմի վրա:
Անդրադառնալով խոջալվեցիների սպանության ադրբեջանական ներքաղաքական գործոններին, Արտակ Զաքարյանը ներկայացրել է բազմիցս նշված իրողությունը, ըստ որի, Ադրբեջանի ազգային ճակատի ընդդիմադիր ուժերը, 1992 թվականին սեփական ժողովրդի կոտորածը կազմակերպելով, նպատակ էին հետապնդում տապալել նախագահ Այազ Մութալիբովի իշխանությունը, ինչի մասին անձամբ վկայել է հենց ինքը` Մութալիբովը, 1992 թվականին ռուսական «Նեզավիսեմայա գազետա» օրաթերթում:
Կոչ անելով ավելի համապարփակ կերպով ծանոթանալ ինչպես վերոնշյալ, այնպես էլ առկա բազմաթիվ այլ փաստավավերագրական նյութերին, ժամանակին այդ սարսափելի իրադարձություններին ականատես եղած լրագրողների ու հետազոտողների վկայություններին` Զաքարյանը հույս է հայտնել ստանալ տարբեր երկրների խորհրդարանական գործընկերների աջակցությունը`պատմական իրողությունների սրբապիղծ խեղաթյուրման և Ադրբեջանի հակահայկական կեղծ հնարքներին դեմ պայքարի գործում»:
