Արմեն Գևորգյանն այցելել է Աշոցքի տարածաշրջան

ՀՀ փոխվարչապետ, տարածքային կառավարման նախարար Արմեն Գեւորգյանն այսօր այցելեց Շիրակի մարզի Աշոցքի տարածաշրջան:

Փոխվարչապետն այցն սկսեց Բավրա համայնքից: Մարզպետ Ֆելիքս Ցոլակյանի,  Բավրայի եւ հարակից համայնքների ղեկավարների մասնակցությամբ տեղի ունեցած հանդիպմանը քննարկվեցին համայնքներում իրականացվող ծրագրերին, առկա խնդիրներին, սեփական եկամուտների հավաքագրմանը վերաբերող եւ  ընթացիկ այլ հարցեր: Մասնավորապես բարձրացվեց տարածաշրջանի համայնքների գազիֆիկացման խնդիրը: Փոխվարչապետը տեղեկացրեց, որ ներկայումս  քննարկվում է հարցը Բավրայի մաքսակետի արդիականացման ծրագրի շրջանակում լուծելու հնարավորությունը:  Մյուս խնդիրը վերաբերում էր  հողօգտագործման հարցերին` կապված հայ-վրացական պետական սահմանի  սահմանազատման  գործընթացի հետ: Փոխվարչապետը մարզպետին հանձնարարեց խնդիրը պահել  ուշադրության կենտրոնում:

Ղազանչի համայնքի ղեկավարն էլ բարձրացրեց  համայնքային սեփականություն հանդիսացող գյուղատնտեսական նշանակության հողերի լրացուցիչ  սեփականաշնորհում իրականացնելու հարցը: Ա. Գեւորգյանը տեղեկացրեց, որ այն  քննարկվել է կառավարությունում, շրջանառության մեջ է դրվել համապատասխան փաստաթուղթը եւ, ակնկալվում է, որ  երկու գյուղերի` Ղազանչիի եւ Փոքր Սեպասարի նմանատիպ խնդիրն առաջիկայում լուծում կստանա: Բարձրացվեցին նաեւ միջհամայնքային միավորումների կողմից տեղական հարկերի բազաների արդյունավետ կառավարման հետ  կապված հարցեր: Նշվեց, որ նոր, առավել արդյունավետ լուծումների անհրաժեշտություն է առաջացել, եւ այդ հարցում ակնկալվում է կառավարության աջակցությունը:

Փոխվարչապետն այնուհետեւ շրջայց կատարեց Բավրայի նորակառույց համայնքային կենտրոնի շենքում, որտեղ ներկայումս իրականացվում են ներքին հարդարման աշխատանքներ: Կենտրոնը կառուցվել է «Հայաստան» համահայկական հիմնադրամի ծրագրով, որի ընդհանուր արժեքը շուրջ 70 մլն դրամ է: Փոխվարչապետին տեղեկացվեց, որ աշխատանքները կավարտվեն առաջիկայում: Նոր կենտրոնի շենք կտեղափոխվի գյուղապետարանի աշխատակազմը, այնտեղ կգործի նաեւ հանդիսությունների սրահ, գրադարան, ինչպես նաեւ կլինի համակարգչային սենյակ:

Փոխվարչապետն այցելեց նաեւ Բավրայի սահմանային անցակետ, տեղեկացավ  արդիականացման ծրագրի շրջանակում նախատեսվող աշխատանքների մասին:

Այնուհետեւ Ա. Գեւորգյանը մեկնեց Աշոցք, որտեղ եւս ծանոթացավ իրականացվող ծրագրերի ընթացքին: Համայնքում «Հայաստան» համահայկական հիմնադրամի ծրագրով կառուցվում է դպրոցի նոր շենք: Փոխվարչապետին զեկուցվեց, որ  շինարարական աշխատանքները նախատեսվում է ավարտել մայիսին: Դպրոցը նախատեսված է 400 աշակերտի համար, ունենալու է կաթսայատուն եւ ջեռուցման համակարգ, երկու մարզադահլիճ` բացօթյա մարզահրապարակով եւ դպրոցի ներսում գործող դահլիճով:  Ծրագրի ընդհանուր արժեքը  736 մլն դրամ է:

Համայնքի նախկին դպրոցի մասնաշենքերից մեկը ներկայումս վերակառուցվում է որպես բազմաբնակարան շենք, որտեղ պետք է տեղափոխվեն վթարային շենքերից մեկի ընտանիքները: Այդ ծրագրի իրականացման համար մարզի առաջնահերթ խնդիրների լուծման չորրորդ հրատապ ծրագրով  հատկացվել էր 31 մլն դրամ: Փոխվարչապետին տեղեկացվեց, որ շինարարական աշխատանքները  կվերսկսվեն մարտից եւ, ակնկալվում է, որ շենքը շահագործման կհանձնվի մայիսին:

Համայնքում Հայաստանի սոցիալական ներդրումների հիմնադրամի ծրագրով  հիմնանորոգվել է մանկապարտեզը: Ներկայումս կատարվում են ներքին հարդարման աշխատանքներ, շենքն ամբողջությամբ  պատրաստ կլինի մայիսին, ինչպես նաեւ կապահովվի անհրաժեշտ գույքով:  Ծրագրի ընդհանուր արժեքը կկազմի շուրջ  74 մլն դրամ:

Փոխվարչապետը կարեւորեց  ծրագրերի նշանակությունը համայնքի բնակիչների համար` միաժամանակ  անհրաժեշտ  համարելով հաստատությունների շահագործման համար անհրաժեշտ պայմանների ապահովումը եւ համայնքապետին հորդորեց  դրանց  պահպանման համար անհրաժեշտ միջոցներ նախատեսել համայնքային բյուջեում:

Փոխվարչապետն այցն ավարտեց Գյումրիում: Քաղաքապետարանում մարզպետի եւ քաղաքապետի մասնակցությամբ անցկացված խորհրդակցության ընթացքում քննարկվեցին իրականացվող ծրագրերին առնչվող  հարցեր: Քաղաքապետ Սամվել Բալասանյանը տեղեկություններ ներկայացրեց  համայնքային ենթակայության հաստատությունների գործունեության, ինչպես նաեւ  փողոցների  ասֆալտապատման եւ բարեկարգման աշխատանքների ընթացքի  մասին: Քննարկվեցին նաեւ  այն առաջարկությունները, որոնք քաղաքային եւ մարզային իշխանությունները ներկայացրել են` մարզի առաջնահերթ խնդիրների լուծման  նոր` հինգերորդ հրատապ ծրագրում  ընդգրկելու համար:

Տարածքային կառավարման նախարարության հասարակայնության հետ կապերի բաժին