Էրդողանն ու Օբաման վերջին ավելի քան կես տարում առաջին անգամ հեռախոսազրույց են ունեցել
Թուրքական Hürriyet թերթի փոխանցմամբ՝ Թուրքիայի վարչապետ Ռեջեփ Էրդողանն ու ԱՄՆ նախագահ Բարաք Օբաման վերջին կես տարում առաջին անգամ հեռախոսազրույց են ունեցել միմյանց հետ:
Նշվում է, որ թուրք-ամերիկյան հարաբերությունները որոշակիորեն սրվել էին նախորդ տարվա ամռանը «Գեզի» այգու համար բողոքի ակցիաների ժամանակ, ինչը ևս մեկ անգամ տեղի ունեցավ դեկտեմբերի 17-ին Թուրքիայում իրականացված հակակոռուպցիոն գործողությունից հետո:
Վերջին 6 ամիս և 10 օրվա ընթացքում տեղի ունեցած առաջին հեռախոսազրույցի ժամանակ Էրդողանն ու Օբաման քննարկել են երկու երկրների միջև հարաբերությունների հարցը, Սիրիայի, Իրաքի, Կիպրոսի ու Իսրայելի հարցերը:
Մասնավորապես, խոսք է գնացել Սիրիական հակամարտության կարգավորման, Իրաքում Բաղդադի ու Էրբիլի միջև ձեռք բերված էներգետիկ պայմանավորվածության, Կիպրոսում հակամարտող կողմերի միջև վերսկսված բանակցային գործընթացի և թուրք-իսրայելական հարաբերությունների կարգավորման մասին:
