Ուկրաինական ընդդիմությունը շրջափակել է խորհրդարանի ամբիոնը
Ուկրաինական UNIAN լրատվական գործակալության փոխանցմամբ՝ ընդդիմությունը շրջափակել է Գերագույն ռադայի ամբիոնը և պրեզիդիումը՝ որպես բողոքի նշան խորհրդարանի նախագահ Վլադիմիր Ռիբակի գործողությունների դեմ: Ռիբակը հրաժարվել է գրանցել 2004 թվականի Սահմանադրությանը վերադարձ կատարելու մասին նախագիծը:
Այս մասին լրագրողների հետ զրույցում հայտարարել է «Սվոբոդա» խմբակցության առաջնորդ Օլեգ Տյագնիբոկը: Նա ընդգծել է, որ իշխանություններն ադեկվատ չեն գնահատում ուկրաինական հասարակությունում ստեղծված իրավիճակը:
«Բատկիվշչինա» խմբակցության առաջնորդ Արսենիյ Յացենյուկն իր հերթին Ռիբակից պահանջել է չխախտել օրենքն ու Սահմանադրությունը և անհապաղ օրակարգում ընդգրկել այդ նախագիծը:
