Իրանում ուղևորատար ավտոբուսն ընկել է 40 մետր բարձրությունից. կա 15 զոհ
Իրանական ISNA լրատվական գործակալության փոխանցմամբ՝ Իրանում ուղևորատար ավտոբուսն ընկել է անդունդը: Միջադեպը գրանցվել է Լարիջան քաղաքի մոտ, ուր վթարի է ենթարկվել VOLVO մակնիշի ուղևորատար ավտոբուս:
Դրա հետևանքով զոհվել է 15 մարդ, ևս 19 մարդ ստացել է տարբեր աստիճանի մարմնական վնասվածքներ: Միջադեպը գրանցվել է այսօր՝ տեղական ժամանակով ժամը 04.15-ին: Թեհրան մեկնելու ճանապարհին ավտոբուսն ընկել է 40 մետր բարձրությունից:
Դեպքի վայր ժամանած փրկարարները տուժածներին տեղափոխել են մոտակա հիվանդանոցներ:
