Էրդողանը Գյուլենի կողմնակիցներին կոչ է արել ստեղծել կուսակցություն
Թուրքական Milliyet թերթի փոխանցմամբ՝ Թուրքիայի վարչապետ Ռեջեփ Էրդողանն ԱՄՆ-ում բնակվող հասարակական գործիչ Ֆեթհուլլահ Գյուլենի կողմնակիցներին կոչ է արել ստեղծել կուսակցություն՝ ժողովրդավարական ճանապարհով քաղաքական պայքար մղելու համար:
Էրդողանի խոսքերով՝ Գյուլենի կողմնակիցները տեղական ինքնակառավարման մարմինների (ՏԻՄ) ընտրություններից առաջ իրականացնելու են հակակառավարական քարոզչություն: Ավելի վաղ Էրդողանը քննադատել էր Գյուլենի շարժումը՝ այն որակելով որպես «զուգահեռ կառույց», որը շանտաժի է ենթարկում երկրի քաղաքական բոլոր ուժերին, այդ թվում նաև ընդդիմությանը:
Էրդողանի խոսքերով՝ այդ շարժման նպատակը բոլոր պետական մարմիններ ու կառույցներ ներթափանցելն է՝ սեփական դավադիր նպատակներն առաջ տանելու համար: Թուրքիայում ՏԻՄ ընտրությունները նշանակված են 2014 թվականի մարտի 30-ին:
