Արմեն Աշոտյան. Ծառուկյանի ելույթի «ամենառիսկով» հատվածներն անգամ թույլատրված գծից կոշիկի ծայրը հանելու փորձեր էին հիշեցնում
ՀՀԿ փոխնախագահ, ՀՀ կրթության և գիտության նախարար Արմեն Աշոտյանը ֆեյսբուքյան իր էջում անդրադարձել է ԲՀԿ այսօրվա համագումարին՝ այն վերնագրելով «Կավից ոտքերով «հսկան»»:
«Ահա և անցյալում է խորհրդավորության շղարշով պատված, դարակազմիկ իրադարձության հավակնություններով, սակայն իրականում դատարկ փամփուշտով կրակոցի նմանված ԲՀԿ համագումարը:
Ծառուկյանի ելույթի «ամենառիսկով» հատվածներն անգամ թույլատրված գծից կոշիկի ծայրը հանելու փորձեր էին հիշեցնում: Քաղաքական տեսակետից կաթնատամների փուլը չանցած ԲՀԿ-ն ջանում է իբր թե ատամ գցել:
Ավելի մանր տրամաչափի որոշ բհկականներ`Նաիրա Զոհրաբյանն ու Վարդան Օսկանյանը, ՌԱԲՈՉԻՅ Ի ԿՈԼԽՈԶՆԻՑԱՅԻ սոցռեալիստական խրոխտությամբ, փորձ կատարեցին մտքի գիգանտ ներկայանալ` այդպես էլ չերկնելով որևէ արժեքավոր միտք:
Իհարկե, տափաստաններում և անապատներում ամեն մի բլուր շրջապատի համար կարող է սար թվալ: Բայց Հայաստանի քաղաքական ռելիեֆը միայն այդ տափաստաններից չէ բաղկացած: Լեռնաշղթաները շատ ավելին են ու ցայտուն, որոնց կողքին առանձին վերցրած բլուրներ ուղղակի կորում են:
Հին հույները, ունենալով ճարտարապետության և արվեստի բնագավառներում ահռելի փորձ, լավ գիտեին, որ անգամ ամենամեծ ու հսկա արձանները հեշտությամբ փլվում են, եթե դրանց ոտքերը բավականաչափ ամուր չեն:
Այսօր պարզվեց, որ Հայաստանի քաղաքական կյանքում կան դեռ մարդիկ, որոնք այդքանը չեն գիտակցում»:
