ԱՄՆ-ում ձնաբքի հետևանքով զոհվել է 25 մարդ
Ամերիկյան Associated Press լրատվական գործակալության փոխանցմամբ` ԱՄՆ-ում ձյունահողմի հետևանքով զոհվածների քանակը հասել է 25-ի: Նրանցից մեկը Նյու Յորքի բնակիչ հղի կին է, ով ընկել է ձյուն մաքրող մեքենայի տակ: Բժիշկներին հաջողվել է կեսարյան հատման միջոցով փրկել նրա երեխային:
Զոհվածների թվում հայտնվել է նաև երկու մարդ, որոնք Հյուսիսային Կարոլինայի խճուղիներից մեկում օգնել են ձյան մեջ խրված բեռնատարին` դուրս գալու դրանից: Ձնաբքի պատճառով երեկ ԱՄՆ-ում չեղյալ է հայտարարվել 2100 ավիաչվերթ:
Եղանակային անբարենպաստ պայմանների պատճառով տասնայակ հազարավոր ծաղիկներ` Սուրբ Վալենտինի կապակցությամբ ավանդական նվերները, ժամանակին չեն հասցվել պատվիրատուներին:
ԱՄՆ-ի տարբեր հատվածներում ձնաբքի պատճառով հոսանքազրկվել է մոտ 1.2 միլիոն մարդ: Արդեն մի քանի օր է, ինչ 8 նահանգում չեն գործում դպրոցները: 2013-2014 թվականի ձմեռը ԱՄՆ-ում մի շարք ռեկորդներ է սահմանել տեղումների քանակով:
