Բրազիլիայի էներգոհամակարգի վթարի պատճառով հոսանքազրկվել է 5-6 միլիոն մարդ
Բրիտանական Reuters լրատվական գործակալության փոխանցմամբ՝ Բրազիլիայի էներգոհամակարգի վթարի պատճառով 11 նահանգում հոսանքազրկվել է 5-6 միլիոն մարդ: Հոսանքազրկումն առնչվել է նաև այն նահանգներին, ուր հունիսին տեղի է ունենալու ֆուտբոլի Աշխարհի առաջնությունը:
Մասնավորապես, մի քանի ժամով հոսանքազրկվել են Բրազիլիայի երկու խոշորագույն քաղաքները՝ Սան Պաուլուն ու Ռիո դե Ժանեյրոն: Էներգետիկայի նախարարությունը հայտնել է, որ վթարի համար պատճառ է հանդիսացել կարճ միացումը:
Վթարը տեղի է ունեցել այն բանից մեկ օր անց, երբ գերատեսչության ղեկավար Էդիսոն Լոբաուն հայտարարել է, որ «գոյություն չունի» հոսանքազրկման որևէ ռիսկ: Բրազիլիայում էլեկտրաէներգիայի պակասը հատկապես սուր է զգացվում ամռանը՝ կապված հէկերի ջրամբարներում ջրի մակարդակի նվազեցման հետ:
Վերջին անգամ Բրազիլիայում մասշտաբային հոսանքազրկում գրանցվել է 2013 թվականի օգոստոսին: Այն ժամանակ հոսանքազրկվել էր 8 նահանգի բնակչություն:
