Գերմանիայի ու Ֆրանսիայի արտգործնախարարները մարտի սկզբին կժամանեն Վրաստան
Грузия Online-ի փոխանցմամբ՝ Գերմանիայի ու Ֆրանսիայի արտգործնախարարները մարտի սկզբին կժամանեն Վրաստան: Այս մասին հայտնի է դարձել երեկ, երբ Մյունխենի անվտանգության կոնֆերանսի շրջանակներում տեղի է ունեցել Վրաստանի վարչապետ Իրակլի Գարիբաշվիլիի ու Գերմանիայի արտգործնախարար Ֆրանկ Վալտեր Շտայնմայերի հանդիպումը:
Այս մասին հայտարարել է Վրաստանի վարչապետի մամուլի ծառայությունը, ըստ որի՝ այդ հանդիպման ժամանակ կողմերը քննարկել են երկկողմ ու բազմակողմ համագործակցությանն առնչվող հարցերի լայն շրջանակ: Հանդիպման ժամանակ քննարկվել են նաև Վրաստանի եվրաատլանտյան ձգտումները, ռուս-վրացական հարաբերությունները և Վրաստանի օկուպացված տարածքներում տիրող իրավիճակը:
Հանդիպման ժամանակ գերմանացի դիվանագետն աջակցություն է հայտնել Վրաստանին: Հանդիպմանը մասնակցող Վրաստանի արտգործնախարար Մայա Փանջիկիձեն ավելի ուշ հայտարարել է, որ Գերմանիայի ու Ֆրանսիայի արտգործնախարարների այցը Վրաստան հաստատում է ԵՄ-ի հետ Ասոցացման համաձայնագիր ստորագրելու ճանապարհին Վրաստանին նրանց աջակցությունը:
