Վենեսուելայի նախագահն անձամբ է ստուգում ոստիկանության աշխատանքը`ծպտված շրջելով քաղաքում
Վենեսուելայի նախագահ Նիկոլաս Մադուրոն անձամբ է ստուգում ոստիկանության աշխատանքը` ծպտված շրջելով քաղաքում: Այդ մասին հայտնել է ՆԳ նախարար Միգել Ռոդրիգեսը ոստիկանության ակադեմիայում հանդիպման ժամանակ:
«Նախագահ Մադուրոն սովորություն ունի անձամբ ստուգել մեր աշխատանքը, նա թաքուն կերպով մեքենայով շրջում է Կարակասում»,-հայտարարել է նախարարը:
Նա պատմել է, որ հինգշաբթի Մադուրոն շրջել է քաղաքում եւ անձամբ փողոցային ծեծկռտուքի է ականատես եղել` միաժամանակ նկատելով, որ ոչ հեռվում գտնվող երկու ոստիկանները դանդաղ են գործել: Արդյունքում ոստիկանների հարցը ներկայացվել է կարգապահական հանձնաժողովին:
Նախարարը նշել է, որ իր «զբոսանքների» ժամանակ Մադուրոն չի սահմանափակվում միայն Կարակասի կենտրոնական փողոցներով, այլ լինում է նաեւ արվարձաններում` ոստիկանների աշխատանքը բարդ իրավիճակներում ստուգելու նպատակով: Վենեսուելան, ի դեպ, դասվում է սպանությունների ամենաբարձր մակարդակ ունեցող երկրների թվում:
