«Ժողովուրդ» օրաթերթի հայտարարությունը
«Ժողովուրդ» օրաթերթի խմբագրակազմը հայտարարություն է տարածել, որում մանսավորապես ասվում է.
«ԱԺ պետաիրավական հարցերի մշտական հանձնաժողովի նախագահի տեղակալ Հովհաննես Մարգարյանը վերջապես կատարեց ԱԺ բարձր ամբիոնից հրապարակավ տված իր խոստումը և ՀՀ գլխավոր դատախազություն ուղարկեց մի դիմում՝ ընդդեմ «Ժողովուրդ» օրաթերթի: Սակայն այդ դիմումն ընթերցողների մոտ լավագույն դեպքում միայն լայն ժպիտ է առաջանում:
Հիշեցնենք, որ դեկտեմբերի 13-ին հրավիրված ասուլիսին Հ. Մարգարյանն ասել է, թե ինքը 150 հազար դոլար չի տվել Արթուր Բաղդասարյանին պատգամավորական մանդատ ստանալու համար. «Սա ակնհայտ սուտ է և զրպարտություն: Ես դիմել եմ ոչ թե դատարան, այլ այս և մի քանի այլ հարցերով, որոնք մեղադրանք են համարվում Քրեական օրենսգրքով, դիմել եմ դատախազություն: Այստեղ մի կողմին մեղադրում են առանձնապես խոշոր չափերի կաշառք տալու մեջ, մյուս կողմին` վերցնելու: Նշվում է, որ սա եղել է պարբերաբար, իսկ ես և իմ գործընկերները պատգամավոր ենք ընտրվել երեք անգամ…»:
Հիմա դառնանք ժպիտներին՝ պաշտոնապես տեղեկացնելով, որ վերը նշված ձևակերպմամբ «Ժողովուրդ» օրաթերթը որևէ տեղեկություն չի հրապարակել. դա սուտ է և զրպարտություն: Մենք գրել ենք Արթուր Բաղդասարյանի հարստացման մասին հոդված, որտեղ մի հատվածը մեջբերում ենք արել 3 տարի առաջ հրապարակված նյութից: Հավանաբար Հովիկ Մարգարյանը «տեմպի տակ ընկած» է խոսել՝ չհասկանալով խոսքերի լրջությունը: Ինչո՞ւ, որովհետև լրատվամիջոցի և լրագրողների նկատմամբ քրեական հետապնդում հարուցելու անթաքույց հույսով գրված Մարգարյանի այդ նամակն իրականում քաղաքական դատողությունների մի ամբողջ փունջ է, թե ինչպես է ՕԵԿ-ը վիրավորվել այս կամ այն քաղաքական գնահատականից: Այնտեղ չկան իրավական քայլեր կատարելու համար անհրաժեշտ տեղեկություններ: Գրեթե երկուէջանոց դիմումի մեջ նշված միակ «քրեածին» ձևակերպումն այս է. «Ժողովուրդ» օրաթերթը գրել է, որ «հիշենք» «Հայկական ժամանակ» թերթի հրապարակումը, ուր գրված է. «ՕԵԿ համամասնական ցուցակի անցողիկ տեղերում հայտնվելու համար մարդիկ Արթուր Բաղդասարյանին վճարել են յուրաքանչյուրը 150 հազարական դոլար»: Համեմատեցի՞ք վերը բերված ձևակերպման հետ: Միանգամայն տարբեր բաներ են:
Այնուամենայնիվ, ՕԵԿ-ին ի սկզբանե չմերժելու համար վերջին ձևակերպման մասով ՀՀ գլխավոր դատախազ Գևորգ Կոստանյանն ԱԺ պատգամավորի դիմումը մակագրել է իր տեղակալ Հրաչյա Բադալյանին: Վերջինս էլ իր հերթին հանձնարարագիր է ուղարկել ՀՀ ոստիկանության կազմակերպված հանցավորության դեմ պայքարի 6-րդ գլխավոր վարչություն՝ կոռուպցիայի և կաշառակերության հարցով զբաղվող բաժին, որպեսզի ուսումնասիրեն 150 հազար դոլարի մութ պատմությունը: «Ժողովուրդ» օրաթերթը ոստիկանությանը տվեց անհրաժեշտ բացատրությունը՝ հիասթափեցնելով թերթի գործունեության մեջ քրեածին էլեմենտներ փնտրող օրինապահներին:
Իհարկե, մինչ այս դիմումն էլ խիստ կասկածելի էր, որ ԱԺ պետաիրավական հարցերի հանձնաժողովի նախագահի տեղակալ Հովիկ Մարգարյանը լուրջ իրավաբանական գիտելիքներ ունի: Բայց այս դիմումը վերջնականապես ապացուցեց, որ պատգամավորն իրավաբանությունից, մեղմ ասած, հեռու է և, լինելով օրենսդիր մարմնի ներկայացուցիչ, նույնիսկ օրենքներ չի կարդացել՝ հասկանալու համար, որ համաձայն «Զանգվածային լրատվության մասին» ՀՀ օրենքի 9-րդ հոդվածի երկրորդ մասի երրորդ կետի` «Լրատվական գործունեություն իրականացնողն ազատվում է տվյալ տեղեկատվության տարածման համար պատասխանատվությունից, եթե դա՝ հրապարակային ելույթի, պետական մարմինների պաշտոնական փաստաթղթերի, լրատվության այլ միջոցի կամ հեղինակային որևէ ստեղծագործության բովանդակած տեղեկատվության բառացի կամ բարեխիղճ վերարտադրությունն է, և դա տարածելիս ինքը կատարել է հղում այդ աղբյուրին»:
«Ժողովուրդ» օրաթերթը, ղեկավարվելով ԶԼ մասին օրենքի 9-րդ հոդվածով, պատշաճ հղում է կատարել «Հայկական ժամանակ» օրաթերթին, հետևաբար ազատվում է պատասխանատվությունից: Տեղեկացնենք, որ ՀԺ-ն էլ իր հերթին օգտվել է ռուսական wek.ru կայքէջից՝ թարգմանաբար ներկայացնելով ԱԽՔ Արթուր Բաղդասարյանի մասին 2010թ. արված «Հայաստանը թալանողները-3» հրապարակումը:
Այսպիսով, եթե Հովհաննես Մարգարյանն իսկապես սկզբունքային գործիչ է և խնդիր է դրել իր և “Օրինաց երկիր> կուսակցության կասկածելի բարի համբավը փրկել, ապա տրամաբանական է, որ պետք է դիմի Ռուսաստանի Դաշնության դատախազություն՝ պահանջելով պատժել wek.ru կայքին «ստի և զրպարտության» համար: Գուցե ՕԵԿ-ին այս հարցում օգնի նաև ՌԴ անվտանգության խորհրդի քարտուղար, Արթուր Բաղդասարյանի սիրելի Նիկոլայ Պատրուշևը:
Հավելենք, որ նույնպիսի իրավազուրկ ու հիմնազուրկ հայցեր էլ ՕԵԿ-ը դատարանին է ներկայացրել, որոնց մանրամասները կտեղեկացնենք առաջիկայում: Մինչ այդ մնում է տարակուսել, թե ինչու է դատարանը վարույթ ընդունել այդ ծիծաղելի հայցերը՝ շատ լավ իմանալով, որ ՕԵԿ և բարի համբավ ձևակերպումներն ընդհանրություններ չունեն: Ու սա ապացուցվել է ոչ մեկ անգամ:
«Ժողովուրդ» օրաթերթը մանրամասն ուսումնասիրելով ՕԵԿ-ի ներկայացրած իրավական փաստաթղթերը, եկել է այն եզրահանգման, որ այդ կուսակցությունը նվազագույնն իր առջև խնդիր է դրել թերթի կողքին ՕԵԿ-ի անունը դնելով հեղինակություն ձեռք բերել, իսկ առավելագույնը լրատվամիջոցին տուգանքի ենթարկելու իրավական որոշմամբ ֆինանսական վնաս հասցնել ազատ խոսքին: Ցավոք պետք է հիասթափեցնենք՝ երկու ծրագրերն էլ ձախողվելու են»:
