Չորսամյա փոքրիկի աչքի պրոթեզավորումը կարելի է համարել լուծված
«Շիրակ կենտրոնի» կողմից պատրաստված «Չորսամյա Ֆելիքսի ամանորյա երազանքն էլ` աչքի ոսպնյակն է» տեսանյութի հրապարակումից անմիջապես հետո աննախադեպ արձագանքներ եղան: Բազմաթիվ մեր հայրենակիցներ ցանկություն հայտնեցին անմիջական աջակցություն ցուցաբերել տեսանյութում ներկայացված այս ընտանիքին:
Այսօր՝ վաղ առավոտյան «Շիրակ կենտրոնի» գրասենյակ զանգահարեց նաև Շիրակի մարզպետարանի առողջապահության բաժնի վարիչ Հայկանուշ Ավետիսյանը, ինչպես նաև Շիրակի մարզպետարանի առողջապահության և սոցապվարչության պետ Հովհաննես Հովհաննիսյանը: Զանգեր ստացանք նաև առողջապահության նախարարությունից:
Պաշտոնյաները հավաստիացրեցին, որ արդեն իսկ խնդիրը լուծված է: Ձեռք բերված համատեղ պայմանավորվածության համաձայն Երևանում, երկուշաբթի օրը սոցապնախարարության և «Փրկություն» կազմակերպության կողմից կիրականացվի չորսամյա Ֆելիքսի բացակա աչքի արհեստական պրոթեզավորում: Իսկ Շիրակի մարզպետարանի առողջապահության և սոցապվարչության պետ Հովհաննես Հովհաննիսյանը հավաստիացրեց, որ այսօր առավոտյան, տեսանյութը դիտելուց անմիջապես հետո Շիրակի մարզպետարան է հրավիրվել երեխայի մայրը, նրան տրվել է բժշկական ուղեգիր, ինչպես նաև անհրաժեշտ գումար ճանապարհածախսի համար:
«Շիրակ կենտրոն» ՀԿ
