Համանախագահները հանդիպել են քաղաքացիական հասարակության ներկայացուցիչների հետ
Այսօր Ստեփանակերտի մամուլի ակումբում կայացել է արցախյան քաղաքացիական հասարակության ներկայացուցիչների հանդիպումը ԵԱՀԿ Մինսկի խմբի ամերիկացի համանախագահ Ջեյմս Ուորլիքի եւ ֆրանսիացի համանախագահ Ժակ Ֆորի հետ։
ԵԱՀԿ Մինսկի խմբի համանախագահները տեղեկացրել են ղարաբաղյան հակամարտության խաղաղ կարգավորման բանակցային գործընթացի մասին, իսկ արցախյան ոչ կառավարական կազմակերպությունների ղեկավարները ներկայացրել են իրենց գործունեությունը քաղաքացիական խաղաղարարության շրջանակներում։
Հանդիպման մասնակիցները քննարկել են խաղաղ գործընթացին առնչվող մի շարք հարցեր։ Արցախյան քաղաքացիական հասարակության ներկայացուցիչները կարեւորել են կարգավորման գործընթացի մեթոդաբանության եւ փիլիսոփայության փոփոխման անհարաժեշտությունը։
Առանձնակի ուշադրություն է դարձվել պաշտոնական բանակցությունների (Track-1) եւ քաղաքացիական խաղաղարարության (Track-2) միջեւ կապերի զարգացմանը, ինչպես նաեւ դրանց զուգակցման ու խաղաղ գործընթացում հանրության լայն շերտերի ներգրավման արդյունավետ մեխանիզմների որոնմանը։
Ստեփանակերտի մամուլի ակումբ
