Վահան Կարապետյանն ու Սուրենյանցը հերքել են. ոչ մի ծեծ չի եղել
«Ճիշտն ասած, Սուրենյանցի հետ մենք մտերիմներ ենք, երեկ էլ հանդիպել ենք ինձ մոտ՝ «Չերրի» ռեստորանում: Ես էլ շտապում էի, երկու րոպե խոսել ենք, ու ես գնացել եմ»,- Aravot.am-ի հետ զրուցում այսպես արձագանքեց ԲՀԿ խմբակցության պատգամավոր Վահան Կարապետյանը:
Հիշեցնենք, որ hraparak.am-ը տեղեկություն էր հրապարակել այն մասին, որ պատգամավորը ծեծել է քաղաքագետ Սուրեն Սուրենյանցին: Ըստ աղբյուրի՝ նրանք վիճել են միմյանց հետ, ու ԲՀԿ-ական պատգամավորը ազատություն է տվել ձեռքերին:
Վահան Կարապետյանն ասել է, որ այդ տեղեկատվությունն իր համար էլ է անակնկալ եղել:
Հրապարակմանն արձագանքել է նաեւ Սուրեն Սուրենյանցը` ֆեյսբուք սոցիալական կայքում հերքելով շրջանառվող տեղեկությունները. «Մամուլում կեղծ տեղեկատվություն է հայտնվել իմ և ԱԺ պատգամավոր Վահան Կարապետյանի միջև իբրև թե տեղի ունեցած վեճի մասին։ Պաշտոնապես հայտարարում եմ, որ ես ու Վահանն ընկերներ ենք ու մեր մեջ վեճ չի եղել»։
